وپەك ەلدەرى وندىرىلەتىن مۇناي كولەمىن ازايتار ەمەس

وپەك ەلدەرىندە وندىرىلگەن مۇناي كولەمى  بىر عانا ماۋسىم ايىندا 260 مىڭ باررەلگە ارتقان. بۇل - اعىمداعى جىلى  تىركەلگەن ەڭ ۇلكەن كورسەتكىش، دەپ حابارلايدى Bloomberg.

الەمدىك مۇناي نارىعىندا الاڭداۋشىلىق تۋدىرعان ءوسىمنىڭ جارتىسى ليۆيا مەن نيگەرياعا تيەسىلى. ليۆيادا 2017 جىلدىڭ باسىندا تاۋلىگىنە 690 مىڭ باررەل مۇناي وندىرىلسە، ەندى بۇل كورسەتكىش ميلليون باررەلدەن اسىپ وتىر. 2016 جىلى 30 قاراشادا وپەك ەلدەرى مۇنايدىڭ تاۋلىكتىك ءوندىرىس كولەمىن 1,2 ملن باررەلگە، ال ۇيىمعا مۇشە ەمەس وزگە مەملەكەتتەر 558 مىڭ باررەلگە   قىسقارتۋ تۋرالى كەلىسىمگە قول قويعان بولاتىن. اتاپ ءوتۋ كەرەك،  بۇل مىندەتتەمەنى قابىلداعان ەلدەردىڭ قاتارىندا ليۆيا مەن نيگەريا جوق.

اتالعان كەلىسىم كۇشىنە ەنگەننەن كەيىن، 2017 جىلى Brent ساپاسىنداعى  مۇناي باعاسى كوتەرىلىپ، 58 دوللارعا تۇراقتادى. دەگەنمەن كەلىسىم ۇستەلىنە وتىرعان ساۋد ارابياسى بۇرىنعى مەجەدەن تاۋلىگىنە 90 مىڭ، انگولا مەن بىرىككەن اراب امىرلىكتەرى 40 مىڭ باررەلگە ارتىق مۇناي وندىرە باستاۋى الەمدىك نارىقتاعى قارا التىن قۇنىنىڭ 4 شىلدەدە تىركەلگەن دەرەك بويىنشا 49,5 دوللارعا تۇسۋىنە سەبەپ بولدى.

تاعى ءبىر ماڭىزدى دەرەك، وپەك ەلدەرىنەن تۇراتىن مۇناي ءوندىرۋشى نەگىزگى كارتەلدىڭ قۇرامىنا وسى جىلدىڭ مامىر ايىندا ەكۆاتوريالدى گۆينەيانىڭ قابىلدانۋى ۇيىمنىڭ جالپى ءوندىرىس كولەمىن 150 مىڭ باررەلگە ارتتىرعان.

“The Qazaq Times”