Foto: Press TV

Türkiyada 9 mıñ  policey qızmetkeri jwmıstan bosatıldı. Erdoğan biligi jwmıstan quılğan policeylerge AQŞ-ta twratın Fethullah Gülenmen baylanısı bar degen ayıp taqqan. Policiya jaqtıñ bwl äreketin Wlttıq qauipsizdiktiñ müddesine baylanıstı dep tüsindirdi. Bwl turalı “BBC”-diñ resmi saytında habarlanğan edi.

Esteriñizde bolsa, ötken jılı Türkiyada äskeri töñkeris bolıp, saldarınan 249 adam qaza tauıp, 2 mıñğa juıq adam zardap şekken bolatın. El prezidenti Rejep Tayıp Erdrğan bwl büliktiñ bastı wyımdastıruşısı retinde, AQŞ-ta twratın «Gülenşilerdiñ» jetekşisi Fethullah Gülen dep körsetken bolatın. Alayda Gülen bwl ayıptı bütindey teriske şığardı. Ol öziñniñ Amerikada twrğanına wzaq uaqıt bolğanın jäne Türkiya el işindegi jağdaydan beyhabar ekenin köldeneñ tarttı. Tipti, Türkiyada bülik qozğağandardı qatañ ayıptauın da jariyalağan bolatın.

Policeylerdi jwmıstan bosatumen birge, keşegi küni, Türkiyada «Gülenşilder» degen ayıppen mıñnan astam adamdı qamauğa aldı. Bwl türik policeyleriniñ bir aydan bergi eñ auqımdı jürgizilgen operaciyası. Erdoğan ükimetiniñ bwl jolı qamauğa aluğa bwyrıq bergen adamdar sanı üş mıñ eken. Demek, türik elinde qamau, jazalau isi alda tağı boladı degen söz. Oğan qosa elde jariyalanğan saqtıq jağday signalı üş ayğa wzartıldı.

Ötken jılğı bülikten keyin türik biligi 40 mıñğa juıq adamdı qamauğa alıp, 120 mıñ adamdı jwmıstan bosatqan. Olardıñ arasında policiya, sot, JOO-da oqıtuşılar, jurnalister, advokattar jäne äskeri qızmetkerler de bar.

Türkiyada bolıp jatqan sayasi quğın sürgin, Erdoğan biligin Batıs elderine jağımsız etip körsetkeni anıq. Elde Erdoğan ükimetine qarsı toptar barınşa küşpen basıp janıştaldı deuge boladı. Referendum arqılı parlamenttik bilikti prezidenttik bilikke auıstırğan Rejep Tayıp Erdoğan Türkiya sayasi biligindegi dinşilderdi jaqtauşı. Oğan qarsı respublikaşıldar («Respublikaşıl halıq» partiyası) men wltşıldardıñ (Alparslan Türkeş qwrğan «Wltşıl äreket» partiyası) qazirgi jağdayı bilikke teñ deñgeyde qarsı twruğa qauqarsız. Al, wltşıl toptar Erdoğan bilikke kelgennen beri bastı qarsılası bolıp kelgenimen, keyingi kezderi prezidentterin jaqtap ketkeni de bayqaladı. Quğın-sürginnen keyin respublikaşıl toptıñ da quatı meylinşe älsiredi.

Erdoğan ötken jılğı zor kölemdi äskeri büliktiñ bastı «qılmıskeri» dep körsetken Fethullah Gülen de türik biligin dinşilderdi jaqtauşı. Alayda, wltşıldar men respublikaşıl top bwğan qarsı twrıp kelgen. Bir qarağanda Gülen men Erdoğannıñ wqsas sayasi toptıñ şaşbauın köteruşi deuge de keletindey. Gülenniñ 2002 jılı Erdoğannıñ «Ädilet jäne damu» partiyasınıñ bilikke keluine ıqpal etkeni belgili. Aqparattardıñ bärinde eki twlğa qarım-qatınası bitpes teke-tireste aytılıp keledi. Onıñ sebebi, Erdoğan men Gülen arasındağı bilik bölisindegi kelispeuşilik delinedi. Küdikter de joq emes. Ol bolsa – türik biligin tolıqtay Erdoğan nemese sonı qoldauşı küşterdiñ qolına ötkeru üşin Gülen ekeui sayasi oyın oynap otır ma degen. Ärine, bwğan qarsı dau aytatındar köp. Aqiqatı bireu-aq, eki twlğa arasındağı tiresten köptegen adamdar zardap şekti. Äsirese, Erdrğannıñ äskeri bülikti sıltauratıp neşe jüz mıñ halıqqa tırnağın batırıp otırğanı, demokratiyanı, halıq teñdigin jaqtauşılardı aşındıradı.

Qazaqstannıñ senimdi sayasi serigi türik eliniñ tağdırı bizdi de oylandıradı. El işiniñ ala bötendigi men el basşısınıñ dara bilikke qol sozuı türik bolaşağın tığırıqqa tiremese igi edi.

“The Qazaq Times”