AQŞ jağalau küzetiniñ Karib teñizinde Olina tankerin wstauı – jeke bir keme töñiregindegi oqiğa emes, soñğı aylarda qalıptasıp kele jatqan jaña geosayasi şındıqtıñ körinisi. Bwl tanker bwğan deyin Minerva M atauımen belgili bolıp, Reseydiñ sankciyanı aynalıp ötu üşin paydalanatın «tasadağı flotına» jatqızılğan. Mwnday kemelerdiñ bastı erekşeligi – tuın jii auıstıru, menşik qwrılımın jasıru jäne sankciyağa ilingen mwnaydı ärtürli bağıtta tasımaldau. Reuters deregine süyensek, Olina Venesuela portınan mwnay tiep şıqqan, alayda naqtı qayda bet alğanı belgisiz. WSJ mälimetinşe, tanker Şığıs Timor tuın ilip alğan küyi Karib teñizinde wstalğan.

Bwl oqiğa AQŞ-tıñ sankciyalıq sayasatınıñ jaña kezeñge ötkenin añğartadı. Jeltoqsan ayında AQŞ prezidenti Donal'd Tramp Venesuela porttarına bağıt alğan nemese ol jaqtan şıqqan sankciyalanğan tankerlerdiñ barlığına tosqauıl qoyu qajettigin aşıq mälimdegen edi. Sol mälimdemeden keyin Amerika Qwrama Ştattarı qağaz jüzindegi sankciyalardan naqtı teñizdegi operaciyalarğa köşti. Olina-nı eseptegende, keyingi aptada bes tankerdiñ wstalğanı – osınıñ ayqın däleli. Olardıñ arasında Resey tuın ilip jürgen Marinera tankeriniñ boluı da simvoldıq mänge ie.

The New York Times jazuınşa, qazir AQŞ äskeri-teñiz küşteri Venesueladan şıqqan sankciyağa ilingen mwnay tankerlerin Atlant mwhitında belsendi türde izdep jür. Bwl kemelerdiñ basım böligi mwnay tiep alğan küyi qwrlıqtan jüzdegen mil' qaşıqtıqta, Afrika men Europa bağıtına qaray qozğalğan. Basılım mwnı Venesueladan jappay ketu jäne tosqauıldı aynalıp ötuge jasalğan talpınıs dep bağalaydı. Alayda aşıq mwhittıñ özinde tankerlerdiñ wstala bastauı AQŞ-tıñ barlau, sputniktik baqılau jäne teñizdegi operaciyalıq mümkindikteriniñ aytarlıqtay keñeygenin körsetedi.

7 qañtarda birneşe kündik talpınıstan keyin Marinera tankeriniñ wstalıp, ekipaj qwramında Reseydiñ eki azamatı bar ekeni belgili boldı. 9 qañtarda Resey sırtqı ister ministrliginiñ resmi ökili Mariya Zaharova AQŞ prezidenti Tramptıñ şeşimimen bwl eki azamattıñ bosatılğanın habarlap, Mäskeudiñ alğıs aytqanın jetkizdi. Bwl detal'diñ özi jağdaydıñ tek küş qoldanu logikasımen ğana emes, sayasi eseppen de örbip jatqanın añğartadı: Vaşington bir jağınan sankciya rejimin qatañ saqtauğa nietti ekenin körsetse, ekinşi jağınan Mäskeumen şekteuli diplomatiyalıq arnanı tolıq jappay otır.

Olina tankeriniñ wstaluın Resey men Venesuelağa qarsı energetikalıq qısımdı küşeytuge bağıttalğan keşendi strategiyanıñ bir böligi dep qarastırğan jön. AQŞ «tasadağı flot» arqılı sankciyanı aynalıp ötuge jol bermeudi, teñiz joldarın qauipsiz äri baqılausız aymaqqa aynaldırmaudı közdeydi. Bwl sayasattıñ saldarı tek geosayasi deñgeyde ğana emes, älemdik mwnay logistikasına, saqtandıru narığına jäne energiya bağasına da äser etui mümkin. Qısqası, Vaşington sankciyanı endi deklaraciya retinde emes, teñiz üstinde naqtı orındalatın qwral retinde qoldanuğa köşkenin aşıq körsetti.