اقش جاعالاۋ كۇزەتىنىڭ كاريب تەڭىزىندە Olina تانكەرىن ۇستاۋى – جەكە ءبىر كەمە توڭىرەگىندەگى وقيعا ەمەس، سوڭعى ايلاردا قالىپتاسىپ كەلە جاتقان جاڭا گەوساياسي شىندىقتىڭ كورىنىسى. بۇل تانكەر بۇعان دەيىن Minerva M اتاۋىمەن بەلگىلى بولىپ، رەسەيدىڭ سانكتسيانى اينالىپ ءوتۋ ءۇشىن پايدالاناتىن «تاساداعى فلوتىنا» جاتقىزىلعان. مۇنداي كەمەلەردىڭ باستى ەرەكشەلىگى – تۋىن ءجيى اۋىستىرۋ، مەنشىك قۇرىلىمىن جاسىرۋ جانە سانكتسياعا ىلىنگەن مۇنايدى ءارتۇرلى باعىتتا تاسىمالداۋ. Reuters دەرەگىنە سۇيەنسەك، Olina ۆەنەسۋەلا پورتىنان مۇناي تيەپ شىققان، الايدا ناقتى قايدا بەت العانى بەلگىسىز. WSJ مالىمەتىنشە، تانكەر شىعىس تيمور تۋىن ءىلىپ العان كۇيى كاريب تەڭىزىندە ۇستالعان.

بۇل وقيعا اقش-تىڭ سانكتسيالىق ساياساتىنىڭ جاڭا كەزەڭگە وتكەنىن اڭعارتادى. جەلتوقسان ايىندا اقش پرەزيدەنتى دونالد ترامپ ۆەنەسۋەلا پورتتارىنا باعىت العان نەمەسە ول جاقتان شىققان سانكتسيالانعان تانكەرلەردىڭ بارلىعىنا توسقاۋىل قويۋ قاجەتتىگىن اشىق مالىمدەگەن ەدى. سول مالىمدەمەدەن كەيىن امەريكا قۇراما شتاتتارى قاعاز جۇزىندەگى سانكتسيالاردان ناقتى تەڭىزدەگى وپەراتسيالارعا كوشتى. Olina-نى ەسەپتەگەندە، كەيىنگى اپتادا بەس تانكەردىڭ ۇستالعانى – وسىنىڭ ايقىن دالەلى. ولاردىڭ اراسىندا رەسەي تۋىن ءىلىپ جۇرگەن Marinera تانكەرىنىڭ بولۋى دا سيمۆولدىق مانگە يە.

The New York Times جازۋىنشا، قازىر اقش اسكەري-تەڭىز كۇشتەرى ۆەنەسۋەلادان شىققان سانكتسياعا ىلىنگەن مۇناي تانكەرلەرىن اتلانت مۇحيتىندا بەلسەندى تۇردە ىزدەپ ءجۇر. بۇل كەمەلەردىڭ باسىم بولىگى مۇناي تيەپ العان كۇيى قۇرلىقتان جۇزدەگەن ميل قاشىقتىقتا، افريكا مەن ەۋروپا باعىتىنا قاراي قوزعالعان. باسىلىم مۇنى ۆەنەسۋەلادان جاپپاي كەتۋ جانە توسقاۋىلدى اينالىپ وتۋگە جاسالعان تالپىنىس دەپ باعالايدى. الايدا اشىق مۇحيتتىڭ وزىندە تانكەرلەردىڭ ۇستالا باستاۋى اقش-تىڭ بارلاۋ، سپۋتنيكتىك باقىلاۋ جانە تەڭىزدەگى وپەراتسيالىق مۇمكىندىكتەرىنىڭ ايتارلىقتاي كەڭەيگەنىن كورسەتەدى.

7 قاڭتاردا بىرنەشە كۇندىك تالپىنىستان كەيىن Marinera تانكەرىنىڭ ۇستالىپ، ەكيپاج قۇرامىندا رەسەيدىڭ ەكى ازاماتى بار ەكەنى بەلگىلى بولدى. 9 قاڭتاردا رەسەي سىرتقى ىستەر مينيسترلىگىنىڭ رەسمي وكىلى ماريا زاحاروۆا اقش پرەزيدەنتى ترامپتىڭ شەشىمىمەن بۇل ەكى ازاماتتىڭ بوساتىلعانىن حابارلاپ، ماسكەۋدىڭ العىس ايتقانىن جەتكىزدى. بۇل دەتالدىڭ ءوزى جاعدايدىڭ تەك كۇش قولدانۋ لوگيكاسىمەن عانا ەمەس، ساياسي ەسەپپەن دە ءوربىپ جاتقانىن اڭعارتادى: ۆاشينگتون ءبىر جاعىنان سانكتسيا رەجيمىن قاتاڭ ساقتاۋعا نيەتتى ەكەنىن كورسەتسە، ەكىنشى جاعىنان ماسكەۋمەن شەكتەۋلى ديپلوماتيالىق ارنانى تولىق جاپپاي وتىر.

Olina تانكەرىنىڭ ۇستالۋىن رەسەي مەن ۆەنەسۋەلاعا قارسى ەنەرگەتيكالىق قىسىمدى كۇشەيتۋگە باعىتتالعان كەشەندى ستراتەگيانىڭ ءبىر بولىگى دەپ قاراستىرعان ءجون. اقش «تاساداعى فلوت» ارقىلى سانكتسيانى اينالىپ وتۋگە جول بەرمەۋدى، تەڭىز جولدارىن قاۋىپسىز ءارى باقىلاۋسىز ايماققا اينالدىرماۋدى كوزدەيدى. بۇل ساياساتتىڭ سالدارى تەك گەوساياسي دەڭگەيدە عانا ەمەس، الەمدىك مۇناي لوگيستيكاسىنا، ساقتاندىرۋ نارىعىنا جانە ەنەرگيا باعاسىنا دا اسەر ەتۋى مۇمكىن. قىسقاسى، ۆاشينگتون سانكتسيانى ەندى دەكلاراتسيا رەتىندە ەمەس، تەڭىز ۇستىندە ناقتى ورىندالاتىن قۇرال رەتىندە قولدانۋعا كوشكەنىن اشىق كورسەتتى.