Marqwm El'dar Amanbek

Atırau oblısı, Qwlsarı qalasında 17 jastağı jasöspirim El'dar Amanbektiñ qatıgezdikpen öltirilui qoğamda ülken rezonans tudırdı. Bwl oqiğa bir jıl bwrın, 2024 jıldıñ qañtarında orın alğanımen, qılmıstıq is äli künge deyin şeşimin tapqan joq. Marqwmnıñ anası Altınay Şaltaeva tergeudiñ ädiletsiz jürgizilip jatqanın aytıp, kinälilerdiñ jauapkerşilikten qaşıp ketuine alañdaulı dep jazdı Orda.kz saytı.

2024 jıldıñ 19 qañtarında Qwlsarı qalasındağı meyramhananıñ aldında 17 jastağı El'dar Amanbek jäne onıñ dostarı kölikte otırğan kezde, bir top jasöspirim olarğa şabuıl jasaydı. Oqiğa kuägerleriniñ aytuınşa, olar ayaq astınan jabılıp, wruğa, soqqığa jığuğa kirisken, al keybiriniñ qolında pışaq bolğan.

Şabuıldan keyin El'dardıñ eki dosı qaşıp ülgergenimen, El'dar men tağı bir jasöspirim auır jaraqat alğan. El'darğa sanına pışaq swğılğan, küre tamırınan qattı qan ketu saldarınan ol jedel-järdem kelgenge deyin qaytıs boldı.

Küdiktiler qalay jazadan qwtılğan?

Bastapqıda tergeu barısında 12 küdikti wstalğan. Biraq olardıñ törteui keyin äskerge ketip qalğan, al qalğandarı wzaq uaqıt boyı bostandıqta jürgen.

Marqwmnıñ anası Altınay Şaltaeva bwl istiñ ädil tergelmey jatqanına şağımdandı:
"Balamdı öltirgender nege jauap bermeydi? Nege olardıñ keybireui äskeri qızmetke ketip, jazadan qwtılıp jür? Bwl jerde tanıstıq pen tamır-tanıs arqılı isti jauıp tastauğa tırısıp jatqanın körip otırmın."

Küdiktilerdiñ ata-analarınıñ keybiri bwrın qwqıq qorğau organdarında qızmet etken, sondıqtan olar balaların zañ aldında jauap beruden qwtqarıp qalu üşin äskerge jiberdi degen boljam bar.

Tergeu nege sozılıp ketti?

İs Qwlsarı qalasınıñ işki ister böliminde qaralğan. Biraq tergeu barısında negizgi küdiktilerdiñ jauaptarı özgerip, keybiri kuägerge aynalıp ketken. Al küdiktilerdiñ biri – A. esimdi jasöspirim 10 ay boyı tergeuden qaşıp jürgeni anıqtaldı.

Marqwmnıñ anası tergeu amaldarınıñ ädiletsiz jürip jatqanına narazı:
"Balamdı öltirgender tolıq anıqtaldı, biraq tergeu ädiletti bolmağandıqtan, olar bostandıqqa şığıp, jazadan qwtıluda. Kameradan bäri körinip twr. Biraq nege bireui ğana qamalıp, qalğandarı bostandıqta jür?!"

Bastapqıda wstalğan küdiktilerdiñ tek bireui – 16 jastağı N. esimdi jasöspirim uaqıtşa izolyatorğa qamalğan. Biraq onıñ anasınıñ äleumettik jelidegi ündeuinen keyin ol da bostandıqqa şıqtı.

Qazirgi jağday qanday?

Qazir qılmıstıq is Atırau oblısında qayta qaralıp jatır. Jılıoy audanınıñ prokuraturası qılmıstıq kodekstiñ 293-babınıñ 3-böligi (densaulıqqa auır ziyan keltiru maqsatında bwzaqılıq jasau) boyınşa tergeu jürgizude.

Policiya departamentiniñ mälimdemesi boyınşa:

  • Tört küdikti qamauğa alınğan
  • Jeteui üyqamaqta
  • Tergeu ayaqtalğan soñ is sotqa jiberiledi

Marqwmnıñ anası sot ädil şeşim şığaradı dep ümittenedi. Biraq osığan deyin küdiktilerdiñ keybiri äskerge ketip, keybiri bosap şıqqanın eskersek, bwl iske äli de qoğamnıñ aralasuı qajet.

Qoğamnıñ reakciyası

Bwl oqiğa Qazaqstandağı jasöspirimder arasındağı qılmıs pen onıñ jazalanbauı mäselesin qaytadan köterdi. Äleumettik jelilerde halıq zañnıñ älsizdigin, tergeudiñ sozılıp ketuin, qılmıskerlerdiñ jazadan qwtılıp ketuin sınğa aluda.

"Bwl – bir ğana otbasınıñ qayğısı emes, bükil qoğamnıñ mäselesi. Eger biz bügin ünsiz qalsaq, erteñ mwnday jağday kez kelgen otbasında qaytalanuı mümkin!" – dep jazadı qoğam belsendileri.

Qwqıq qorğauşılar men zañgerler Qazaqstanda bwzaqılıq pen jasöspirimder arasındağı qılmıstıq jauapkerşilikti küşeytu kerek dep sanaydı. Sebebi mwnday isterdiñ ädil tergelmeui jäne qılmıskerlerdiñ jazasız qaluı qoğamda zañsızdıqtıñ qalıptasuına äkelui mümkin.

ädildik ornay ma?

El'dar Amanbektiñ ölimi – Qwlsarı ğana emes, bükil Qazaqstan üşin dabıl qaqqan oqiğa. Eger kinäliler ädil jazalanbasa, bwl bolaşaqta jasöspirimder arasındağı qılmıstıñ örşuine alıp kelui mümkin.

Marqwmnıñ anası Altınay Şaltaeva wlınıñ ölimine kinälilerdi jauapqa tartu üşin bar küşin salıp jatır. Biraq bwl iste tek bir ğana ananıñ emes, bükil qoğamnıñ qoldauı qajet.

Qazirgi tañda tergeu jalğasuda. Bwl istiñ ädil şeşimmen ayaqtaluı – Qazaqstannıñ qwqıqtıq memleket retindegi bedeline sın bolmaq.

The Qazaq Times