Qırğızstan aumağında Kloop basılımınıñ qırğız tilindegi ky.kloop.asia saytı aşılmay qaldı. Bwl turalı Ortalıq Aziya jañalıqtar qızmeti jazdı.

Redakciyanıñ habarlauınşa, sayt Qırğızstan mädeniet, aqparat, sport jäne jastar sayasatı ministrliginiñ şeşimimen bwğattalğan. Basılım oğan dälel retinde 1 qaraşada ministrlikten alğan hattıñ köşirmesin jariyaladı. Onda ministrlik 30 qazanda Qırğızstan wlttıq qauipsizdigi jönindegi memlekettik komitetinen hat kelgenin jazğan.

«Kloop.kg saytı «Sayasatker Ravşan Jeenbekov tergeu izolyatorında azaptalğanın mälimdedi» dep atalatın maqala üşin bwğattaldı» dep habarladı mädeniet ministrligi.

Qırğızstan memlekettik organdarı osı mäselege qatıstı äzirge resmi mälimdeme taratqan joq.

Qırküyekte qırğız internet-provayderler Kloop.kg basılımınıñ orıs tilindegi saytın bwğattağan. Al bwnıñ aldında, tamızdıñ ayağında Bişkek prokuraturası sotqa «Klopp Media» qoğamdıq qorın joyu turalı arız tüsirgen. Redakciya prokuratura äreketin «Qırğızstanda söz erkindigine jasalğan qısım» dep bağalağan.

Halıqaralıq wyımdar, sonımen birge Qırğızstandağı mediaqauımdastıq täuelsiz basılımğa qarsı arızdı qaytarıp aludı talap etken.

Qazaqstanda täuelsiz Kloop.kg saytı 2014 jılı bwğattalğan. Sayt redakciyası qazaq biliginiñ materialdı alıp tastau jönindegi talabın orındaudan bas tartqan.