AQŞ Qıtaydı genocid jasauşı el retinde jıldıq esepke kirgizdi. Foto: Foreign Policy

AQŞ Memlekettik departamenti 12 şilde küni «Genocid pen qatigezdiktiñ aldın alu»  turalı jıldıq esebin jariya etti. Memlekettik hatşı Antoni Blinken jariya etken esepte M'yanma, Qıtay, Efiopiya, Irak, Siriya jäne Oñtüstik Sudan siyaqtı altı elde jalğasıp jatqan genocid pen zwlımdıqtı sınğa alğan. Äri bwl esep Qwrama Ştattardıñ osı zwlımdıq äreketterdi toqtatu üşin qarjılıq, diplomatiyalıq jäne özge de amaldardı qalay qoldanatının körsetken.  

«Bilğı esepte alğaş ret M'yanma, Efiopiya, Qıtay, Siriya siyaqtı elder naqtı atalıp, onda bolğan zwlımdıqtar tikeley egjey-tegjeyli sipattaldı. Bwl atalğan elderge bizdiñ kün tärtibimizdegi eñ qatal sırtqı sayasai mindetter bağıttaladı», – dedi AQŞ-tıñ qazirgi bas diplomatı Blinken. Ol sonday-aq esepte körsetilgendey diplomatiyalıq, qarjılıq jäne basqa şaralardı qalay qoldanatındarın tüsindirgen.

Biıl qañtarda AQŞ memlekettik hatşısı Qıtaydıñ Şıñjañdağı sayasatın «genocid jäne adamzatqa qarsı qılmıs» dep bağalağan bolatın. AQŞ Memlekettik departamenti qazir de mwsılman azşılıqtarın wstau nemese olarğa qiyanat jasau üşin jauaptı dep sanalatın qıtaylıq şeneunikterge vizalıq şekteudi jalğastıruda.

Bwdan tıs, Amerika Qwrama Ştattarı, Europalıq Odaq, Britaniya jäne Kanada adam qwqığın bwzuğa baylanıstı qıtaylıq eki şeneunikke sankciya engizdi. Ondağan Qıtay kompaniyası Şıñjañdağı adam qwqığın bwzğanı üşin amerikalıq wyımdardıñ qara tizimine endi.

“The Qazaq Times”