Foto: uralskweek.kz

Qonaev sotı türmedegi belsendi Ermek Narımbaydıñ merziminen erte bosap şığu turalı ötinişin orındamadı. Bwl jöninde advokatı Janar Balğabaeva habarladı. Onıñ aytuınşa, sot belsendiniñ türmede ayıppwldarı barın alğa tartqan. Bwl turalı Ortalıq Aziya jañalıqtar qızmeti jazdı.

"Ayıppwlı bar dep jäne "tärtipti öreskel bwzuşı" dep ötinişin orındamadı. Ayıppwl oğan biıl mausımda salınğan. Biz ayıppwlğa qatıstı şağım tüsirgenbiz. Ol boyınşa tüpkilikti şeşim qabıldanbağan bolatın. [Soğan qaramastan] Sotta onıñ ayıppwlı bar dep eseptelindi" dedi Janar Balğabaeva Azattıq tilşisine.

İsti sud'ya Oljas Küreñbekov qarağan. Advokat şeşimdi apellyaciyağa beretinin ayttı.

Azattıq Qonaev sotınan äzirge jauap ala almadı.

Qwqıq qorğauşılar jasağan "sayasi twtqındar" tizimine engen 52 jastağı Narımbay sayasi belsendiligi üşin birneşe ret qılmıstıq jazağa kesilgen. 2015 jılı qazanda "alauızdıq tudırdı" degen ayıppen üş jılğa sottalğan. Keyin apellyaciya sotı ükimdi jeñildetip, üş jıl şarttı jazağa auıstırğan.

Osıdan keyin Ermek Narımbay özine bilikten qater töngenin aytıp, Ukrainağa ketken. Biıl aqpannıñ basında Qazaqstanğa oralğanda policiya onı Almatı äuejayınan birden wstap äketip, qamauğa alğan. Advokattıñ aytuınşa, 2,5 jıl türmege kesilgen Narımbay jazasınıñ üşten birin ötegen.

Juırda belsendi 54 kün aştıq wstap, kezekten tıs prezident saylau qarsañında saylau uçaskelerindegi hattamalardı onlayn jariyalaudı talap etken. Ortalıq saylau komissiyası onıñ talabı "bir künde orındalatın şarua emes" degen. Şamamen 20 kilodan astam salmaq joğaltıp, densaulığı naşarlağan belsendi 25 qaraşa keşke aştığın toqtattı. Ermek Narımbay bwğan deyin de eñ wzaq aştıq akciyaların basınan ötkergen. 2010 jılı Almatı oblısındağı türmede 73 kün aştıq wstağan belsendi 41 kilogram salmaq joğaltqan. Öziniñ aytuınşa, "özine jasalğan ädiletsizdikterge" qarsılıq bildirgen.