Astana qırküyekte mobilizaciya bastalğannan keyin Qazaqstanğa qaşqan reseylik äskeri qızmetkerge bosqın märtebesin beruden bas tarttı. Bwl jöninde Reuters agenttigine silteme jasap Ortalıq Aziya jañalıqtar qızmeti jazdı. 

Reseydiñ Ukrainağa basıp kiruine qarsı şıqqan 36 jastağı mayor Jilin "özin soğısqa jiberui mümkin ekeni ayqın bolğan şaqta" qırküyekte Qazaqstan şekarasın kesip ötken, dep jazdı mayordıñ äyeli Ekaterinanıñ sözine süyengen aqparat agenttigi.

Reuters jazuınşa, ol Semeyğa "zañsız kirgeni üşin" wstalıp, sottalğan. Sot oğan altı ay şarttı jaza tağayındap, Reseyden şığarudı qaulı etken. Qazaqstan biligi onıñ bosqın märtebesin swrau ötinişin orındamağan. Deportaciyadan qaşıp qwtılğısı kelgen Jilin Kanadanıñ Astanadağı elşiligine qabıldauğa jazıluğa tırısqan, bwdan soñ Armeniyağa ketpek bolğanda äuejayda wstalğan. Reuters jazuınşa, qazir ol qamau merzimin wzartu turalı sot şeşimin kütip otır.

Qazaqstan işki ister ministrligi aqparat qwraldarına bwl is boyınşa aqparat bermedi. Jilinniñ advokatı telefon arqılı kommentariy beruden bas tarttı, dep jazdı Reuters.

Köşi-qon qızmeti Azattıq tilşisine resmi saual jiberu qajettigin ayttı.

Reseylik äskeri qızmetkerdiñ äyeliniñ sözine qarağanda, küyeui "Resey basşılığınıñ Ukrainağa qatıstı äreketimen" kelispegen jäne äskeri qızmetten bosağan jağdaydıñ özinde de "qwpiya mağlwmattardı biletin twlğa retinde" elden zañdı türde kete almağan.

Äyeli küyeuiniñ Resey zañnamasın bwzdı degen küdikpen wstalğanı jöninde policiya anıqtamasın da körsetken. Qwjatta Resey qılmıstıq kodeksindegi "äskerden qaşu" jäne "memlekettik şekaranı zañsız kesip ötu" baptarı körsetilgen. Ekaterina Jilinanıñ äyeli eki balasımen birge Qazaqstanğa zañdı türde kelgen, dep jazdı Reuters.

Jurnalist Evgeniya Baltatarova Telegram-arnasında Qazaqstanğa qaşqan mayordıñ FSB qızmetkeri ekenin jazğan. Onıñ aytuınşa, bosqın märtebesin bermeu turalı şeşim qaraşa soñında şıqqan jäne advokattar onı apellyaciyağa beruge tırısıp jatır. Wstalğan mayor qazir Astanadağı izolyatorda qamauda dep aytıladı.

Reuters maqalasında atalğan jağday Qazaqstan biligin kürdeli diplomatiyalıq dillema aldında qaldırdı dep jazdı.

Qırküyek ayında Reseyde mobilizaciya jariyalanğannan keyin reseylikter körşi elderge, onıñ işinde Qazaqstanğa da ağılğan. Eki apta işinde Reseyden 700 mıñ adam ketti, 200 mıñı Qazaqstanğa kelgen, dep jazdı qazan ayında Forbes basılımı.

Qazaqstan işki ister ministri Marat Ahmetjanov qırküyekte Astana öz elinde halıqaralıq izdeu jariyalanğan reseylikterdi ğana Mäskeuge tapsıratının mälimdegen.