استانا قىركۇيەكتە موبيليزاتسيا باستالعاننان كەيىن قازاقستانعا قاشقان رەسەيلىك اسكەري قىزمەتكەرگە بوسقىن مارتەبەسىن بەرۋدەن باس تارتتى. بۇل جونىندە Reuters اگەنتتىگىنە سىلتەمە جاساپ ورتالىق ازيا جاڭالىقتار قىزمەتى جازدى. 

رەسەيدىڭ ۋكرايناعا باسىپ كىرۋىنە قارسى شىققان 36 جاستاعى مايور جيلين ء"وزىن سوعىسقا جىبەرۋى مۇمكىن ەكەنى ايقىن بولعان شاقتا" قىركۇيەكتە قازاقستان شەكاراسىن كەسىپ وتكەن، دەپ جازدى مايوردىڭ ايەلى ەكاتەرينانىڭ سوزىنە سۇيەنگەن اقپارات اگەنتتىگى.

Reuters جازۋىنشا، ول سەمەيعا "زاڭسىز كىرگەنى ءۇشىن" ۇستالىپ، سوتتالعان. سوت وعان التى اي شارتتى جازا تاعايىنداپ، رەسەيدەن شىعارۋدى قاۋلى ەتكەن. قازاقستان بيلىگى ونىڭ بوسقىن مارتەبەسىن سۇراۋ ءوتىنىشىن ورىنداماعان. دەپورتاتسيادان قاشىپ قۇتىلعىسى كەلگەن جيلين كانادانىڭ استاناداعى ەلشىلىگىنە قابىلداۋعا جازىلۋعا تىرىسقان، بۇدان سوڭ ارمەنياعا كەتپەك بولعاندا اۋەجايدا ۇستالعان. Reuters جازۋىنشا، قازىر ول قاماۋ مەرزىمىن ۇزارتۋ تۋرالى سوت شەشىمىن كۇتىپ وتىر.

قازاقستان ىشكى ىستەر مينيسترلىگى اقپارات قۇرالدارىنا بۇل ءىس بويىنشا اقپارات بەرمەدى. ءجيليننىڭ ادۆوكاتى تەلەفون ارقىلى كوممەنتاري بەرۋدەن باس تارتتى، دەپ جازدى Reuters.

كوشى-قون قىزمەتى ازاتتىق تىلشىسىنە رەسمي ساۋال جىبەرۋ قاجەتتىگىن ايتتى.

رەسەيلىك اسكەري قىزمەتكەردىڭ ايەلىنىڭ سوزىنە قاراعاندا، كۇيەۋى "رەسەي باسشىلىعىنىڭ ۋكرايناعا قاتىستى ارەكەتىمەن" كەلىسپەگەن جانە اسكەري قىزمەتتەن بوساعان جاعدايدىڭ وزىندە دە "قۇپيا ماعلۇماتتاردى بىلەتىن تۇلعا رەتىندە" ەلدەن زاڭدى تۇردە كەتە الماعان.

ايەلى كۇيەۋىنىڭ رەسەي زاڭناماسىن بۇزدى دەگەن كۇدىكپەن ۇستالعانى جونىندە پوليتسيا انىقتاماسىن دا كورسەتكەن. قۇجاتتا رەسەي قىلمىستىق كودەكسىندەگى "اسكەردەن قاشۋ" جانە "مەملەكەتتىك شەكارانى زاڭسىز كەسىپ ءوتۋ" باپتارى كورسەتىلگەن. ەكاتەرينا جيلينانىڭ ايەلى ەكى بالاسىمەن بىرگە قازاقستانعا زاڭدى تۇردە كەلگەن، دەپ جازدى Reuters.

جۋرناليست ەۆگەنيا بالتاتاروۆا تەلەگرام-ارناسىندا قازاقستانعا قاشقان مايوردىڭ فسب قىزمەتكەرى ەكەنىن جازعان. ونىڭ ايتۋىنشا، بوسقىن مارتەبەسىن بەرمەۋ تۋرالى شەشىم قاراشا سوڭىندا شىققان جانە ادۆوكاتتار ونى اپەللياتسياعا بەرۋگە تىرىسىپ جاتىر. ۇستالعان مايور قازىر استاناداعى يزولياتوردا قاماۋدا دەپ ايتىلادى.

Reuters ماقالاسىندا اتالعان جاعداي قازاقستان بيلىگىن كۇردەلى ديپلوماتيالىق ديللەما الدىندا قالدىردى دەپ جازدى.

قىركۇيەك ايىندا رەسەيدە موبيليزاتسيا جاريالانعاننان كەيىن رەسەيلىكتەر كورشى ەلدەرگە، ونىڭ ىشىندە قازاقستانعا دا اعىلعان. ەكى اپتا ىشىندە رەسەيدەن 700 مىڭ ادام كەتتى، 200 مىڭى قازاقستانعا كەلگەن، دەپ جازدى قازان ايىندا Forbes باسىلىمى.

قازاقستان ىشكى ىستەر ءمينيسترى مارات احمەتجانوۆ قىركۇيەكتە استانا ءوز ەلىندە حالىقارالىق ىزدەۋ جاريالانعان رەسەيلىكتەردى عانا ماسكەۋگە تاپسىراتىنىن مالىمدەگەن.