Älemdi auzına qaratqan qazaqtıñ birtuar wlı Dimaş 23 qırküyek Almatı qalasında jeke koncertin ötkizdi. Älemdik arenadağı dañıqtı änşi Resey basqınşılarınıñ Ukrainğa basıp kirgenine qarsılıq retinde koncertinde orıs tilinen bas tarttı.

Bwl keşke älemniñ 68 elinen 6 mıñnıñ üstinde janküyerler kelgen. Baluan şolaq atındağı ortalıq stadionda ine şanşar orın qalmadı. Körermenniñ köñil-küyi de köteriñki boldı. Älemniñ är tüpkirinen kelgen janküyerlerdiñ jılı jüzdesuleri men talanttı änşiniñ tañğajayıp dauısı Almatını özgeşe küyge böledi. Qaladağı belgili qonaqüyler qarbalas qonaq qabıldap, qalanıñ ekinşi tınısı aşılğanday boldı. Bwl keştiñ tağı bir erekşeligi Dimaş orıs tilinde Igor.Krutoydıñ «Lyubov' vstavşih lebedey" äninen basqa än orındalmadı, sonday-aq Dimaş qazaq jäne ağılşın tilinde ğana söyledi. Beybitşilikti näsihattaytın älem jwldızı qarapayımdılığımen jwrttı tänti etti. Älemniñ dürligip, key elderdegi qiın jağdayğa bir-er adam ğana sebepşi, qarapayım halıqtıñ bäri birdey, olardı bölip-jaruğa kelmeydi dep, bügingi geosayasi jağdayğa köñili tolmaytının da aytıp ötti. Öziniñ 15 jasar bauırı Äbilmänswr da bwl keşte tırnaqaldı tuındısımen köpşiliktiñ köñilinen şıqtı. Eñbektegen baladan, eñkeygen qartqa deyin süysine tıñdaytın Dimaş repertuarındağı şığarmalar tolığımen orındalmasa da, 4 sağatqa jalğasqan koncertti jwrt tapjılmay tamaşaladı. Oktavalardı bağındırıp, jürekterge jol tartqan Dimaş fenomeni sırlı älem, Dimaşpen emdelip, Dimaştıñ tilinde söylegisi keletin janküyerler de 24 qırküyekte Almatı arenada kezdesu wyımdastırdı. Kezdesude Dimaştıñ otbası müşeleri de boldı. Eldiñ mahabbatına bölengen qarapayım azamat el men elderdi jalğap twrğan köpir siyaqtı. Reseydiñ Rostov oblısında twratın Dimaş Qwdaybergenniñ fanatı Kristina Qwdaybergenova da kelgen. Esteriñizde bolsa, ol öz tegin auıstırıp, änşiniñ familiyasın alğan bolatın. Dimaştıñ är janküyeriniñ öz tarihı bar, olar äli alda jazıla jatar. Älem tıñdarmandarınıñ qoşametine ie bolğan qazaqtıñ qarşaday balasına aqjol tiledik. Dañqıñ aspanday bersin!

Nwrbätima Baytwrsın

Almatı