Äl-Farabi atındağı Qazaq wlttıq universitetiniñ YUNESKO-nıñ jurnalistika jäne kommunikaciya kafedrasınıñ wyımdastıruımen «Twraqtı damu maqsatında halıqaralıq jurnalistikanı oqıtu model'deri» attı ğılımi-täjiribelik konferenciya biıl altınşı ret ötkizildi. Halıqaralıq jurnalistikanıñ damu trendterine arnalğan ğılımi jiın Almatıdağı YUNESKO Klasterlik byurosınıñ  qoldauımen ötip keledi. Biılğı konferenciya jwmısına AQŞ, Wlıbritaniya, Niderlandı, Pol'şa, Türkiya, Meksika, Resey, Qırğızstan, Özbekstan, Äzirbayjan elderinen ğalımdar, BAQ ökilderi qatısıp, jurnalist qauipsizdigi, klimat özgerisi, media aqparattıq sauattılıq, qaqtığıstardı BAQ betterinde jariyalau, gibridtik bilim berudiñ tehnologiyaları, Ortalıq Aziyadağı migraciya, beybit, demokratiyalıq qoğam qwru t.b. qazirgi tañdağı özekti mäselelerdi qozğap, şeşilu joldarın wsındı. YUNESKO kafedrası älem ğalımdarın, media-pedagogtar men halıqaralıq jurnalisterdi bir platformağa biriktirip, zamanaui jurnalistikanıñ damu ürdisterin jan-jaqtı talqılauğa mwrındıq boldı.

Qazirgi cifrlıq ortada qauipsizdik mäselesi kimdi de bolsa alañdatarı dausız. Osı orayda alqalı jiında qozğalğan jasandı intellekt, ülken derektermen jwmıs, jurnalistikanıñ adamzat ömirindegi mañızı men qızmeti turalı pikirler tüytkildi mäselelerdiñ tiegin ağıttı äri olardıñ şeşimin tabuına jurnalister, halıqaralıq wyımdar, ÜEW, JOO oqıtuşıları men älemdik jurnalistika mektepteri birlese qızmet etui tiis ekendigine tağı da köz jetkizdi.

Halıqaralıq konferenciyanı aşqan äl-Farabi atındağı QazWU prorektorı Tasibekov Haydar qoğam ömirine belsendi qatısıp otırğan qazirgi universitetterdiñ röline toqtaldı. Bügingidey jahandanğan bilim beru paradigması konteksinde älemdi twraqtı damıtu modelin jüzege asıruğa qabiletti «üşinşi wrpaq» universitetteriniñ röli ösip otırğandığın atap ötti.

YUNESKO Klasterlik byurosınıñ öñirlik mamanı Sergey Karpov düniejüzilik baspasöz bostandığı küni qarsañındağı ötkizilgen alqalı jiınnıñ mañızdılığın atap, azamattardıñ senimdi aqparatqa qwqıqtarı, jurnalistikanıñ halıqaralıq standarttarın saqtau akademiyalıq qauımdastıq tarapınan qoldau tauıp otıruı qajettigin basa ayttı. Wlttıq maman YUNESKO äzirlegen eñ mañızdı jurnalistik taqırıptardı qamtitın jappay aşıq onlayn kurstarğa toqtaldı. Osı orayda YUNESKO kafedrasınıñ halıqaralıq joba ayasında Ortalıq Aziya universitetterine arnalğan aşıq onlayn kurstar dayarlap jatqandığın ayta ketu qajet.

Türkitildes jurnalister QQ Prezidenti Näziya Joyamergenqızı Qazaqstan jurnalistikasınıñ qızmet etu erekşelikterine toqtalıp, jurnalisterdiñ aqparat aludağı jäne taratudağı käsibi biligin arttırudıñ mañızdılığına toqtaldı.

Konferenciya jwmısına qatısqan Britaniyadağı «Avrupa» mediaholdinginiñ prezidenti Vatan Öz ben VVS telearnasınıñ Niderlandtağı menşikti tilşisi YUsuf Özkan qazirgi medianıñ eñ mañızdı degen mindetterin atap, faktçek jasau täsilderin meñgeru men jalğan aqparatpen küresu turalı pikirlerimen bölisti.

Konferenciyağa özge elderden qatısqan ğalımdar qazirgi tañdağı halıqaralıq twraqtılıqqa feyk aqparattardıñ ıqpalın basa ayttı. Qazirgi geosayasi jağdayda senimdi, şınayı aqparat berudiñ mañızdılığı, jurnalisterdiñ biliktiligi men käsibi etikanı saqtauı, bolaşaq käsibi bilikti mamandar dayarlaudağı oqıtu formattarı men qwraldarı da nazardan tıs qalğan joq.

Alqalı jiın halıqaralıq wyımdardıñ ökilderi men tanımal media trenerlerdiñ şeberlik sınıptarına wlastı.

Nazgül Şıñğısova

YUNESKO-nıñ jurnalistika jäne

kommunikaciya kafedrasınıñ meñgeruşisi

Äl-Farabi at. QazWU