ءال-فارابي اتىنداعى قازاق ۇلتتىق ۋنيۆەرسيتەتىنىڭ يۋنەسكو-نىڭ جۋرناليستيكا جانە كوممۋنيكاتسيا كافەدراسىنىڭ ۇيىمداستىرۋىمەن «تۇراقتى دامۋ ماقساتىندا حالىقارالىق جۋرناليستيكانى وقىتۋ مودەلدەرى» اتتى عىلىمي-تاجىريبەلىك كونفەرەنتسيا بيىل التىنشى رەت وتكىزىلدى. حالىقارالىق جۋرناليستيكانىڭ دامۋ ترەندتەرىنە ارنالعان عىلىمي جيىن الماتىداعى يۋنەسكو كلاستەرلىك بيۋروسىنىڭ  قولداۋىمەن ءوتىپ كەلەدى. بيىلعى كونفەرەنتسيا جۇمىسىنا اقش، ۇلىبريتانيا، نيدەرلاندى، پولشا، تۇركيا، مەكسيكا، رەسەي، قىرعىزستان، وزبەكستان، ءازىربايجان ەلدەرىنەن عالىمدار، باق وكىلدەرى قاتىسىپ، جۋرناليست قاۋىپسىزدىگى، كليمات وزگەرىسى، مەديا اقپاراتتىق ساۋاتتىلىق، قاقتىعىستاردى باق بەتتەرىندە جاريالاۋ، گيبريدتىك ءبىلىم بەرۋدىڭ تەحنولوگيالارى، ورتالىق ازياداعى ميگراتسيا، بەيبىت، دەموكراتيالىق قوعام قۇرۋ ت.ب. قازىرگى تاڭداعى وزەكتى ماسەلەلەردى قوزعاپ، شەشىلۋ جولدارىن ۇسىندى. يۋنەسكو كافەدراسى الەم عالىمدارىن، مەديا-پەداگوگتار مەن حالىقارالىق جۋرناليستەردى ءبىر پلاتفورماعا بىرىكتىرىپ، زاماناۋي جۋرناليستيكانىڭ دامۋ ۇردىستەرىن جان-جاقتى تالقىلاۋعا مۇرىندىق بولدى.

قازىرگى تسيفرلىق ورتادا قاۋىپسىزدىك ماسەلەسى كىمدى دە بولسا الاڭداتارى داۋسىز. وسى ورايدا القالى جيىندا قوزعالعان جاساندى ينتەللەكت، ۇلكەن دەرەكتەرمەن جۇمىس، جۋرناليستيكانىڭ ادامزات ومىرىندەگى ماڭىزى مەن قىزمەتى تۋرالى پىكىرلەر تۇيتكىلدى ماسەلەلەردىڭ تيەگىن اعىتتى ءارى ولاردىڭ شەشىمىن تابۋىنا جۋرناليستەر، حالىقارالىق ۇيىمدار، ۇەۇ، جوو وقىتۋشىلارى مەن الەمدىك جۋرناليستيكا مەكتەپتەرى بىرلەسە قىزمەت ەتۋى ءتيىس ەكەندىگىنە تاعى دا كوز جەتكىزدى.

حالىقارالىق كونفەرەنتسيانى اشقان ءال-فارابي اتىنداعى قازۇۋ پرورەكتورى تاسيبەكوۆ حايدار قوعام ومىرىنە بەلسەندى قاتىسىپ وتىرعان قازىرگى ۋنيۆەرسيتەتتەردىڭ رولىنە توقتالدى. بۇگىنگىدەي جاھاندانعان ءبىلىم بەرۋ پاراديگماسى كونتەكسىندە الەمدى تۇراقتى دامىتۋ مودەلىن جۇزەگە اسىرۋعا قابىلەتتى «ءۇشىنشى ۇرپاق» ۋنيۆەرسيتەتتەرىنىڭ ءرولى ءوسىپ وتىرعاندىعىن اتاپ ءوتتى.

يۋنەسكو كلاستەرلىك بيۋروسىنىڭ وڭىرلىك مامانى سەرگەي كارپوۆ دۇنيەجۇزىلىك ءباسپاسوز بوستاندىعى كۇنى قارساڭىنداعى وتكىزىلگەن القالى جيىننىڭ ماڭىزدىلىعىن اتاپ، ازاماتتاردىڭ سەنىمدى اقپاراتقا قۇقىقتارى، جۋرناليستيكانىڭ حالىقارالىق ستاندارتتارىن ساقتاۋ اكادەميالىق قاۋىمداستىق تاراپىنان قولداۋ تاۋىپ وتىرۋى قاجەتتىگىن باسا ايتتى. ۇلتتىق مامان يۋنەسكو ازىرلەگەن ەڭ ماڭىزدى جۋرناليستىك تاقىرىپتاردى قامتيتىن جاپپاي اشىق ونلاين كۋرستارعا توقتالدى. وسى ورايدا يۋنەسكو كافەدراسىنىڭ حالىقارالىق جوبا اياسىندا ورتالىق ازيا ۋنيۆەرسيتەتتەرىنە ارنالعان اشىق ونلاين كۋرستار دايارلاپ جاتقاندىعىن ايتا كەتۋ قاجەت.

تۇركىتىلدەس جۋرناليستەر قق پرەزيدەنتى ءنازيا جويامەرگەنقىزى قازاقستان جۋرناليستيكاسىنىڭ قىزمەت ەتۋ ەرەكشەلىكتەرىنە توقتالىپ، جۋرناليستەردىڭ اقپارات الۋداعى جانە تاراتۋداعى كاسىبي بىلىگىن ارتتىرۋدىڭ ماڭىزدىلىعىنا توقتالدى.

كونفەرەنتسيا جۇمىسىنا قاتىسقان بريتانياداعى «Avrupa» مەدياحولدينگىنىڭ پرەزيدەنتى ۆاتان ءوز بەن ۆۆس تەلەارناسىنىڭ نيدەرلاندتاعى مەنشىكتى ءتىلشىسى يۋسۋف وزكان قازىرگى مەديانىڭ ەڭ ماڭىزدى دەگەن مىندەتتەرىن اتاپ، فاكتچەك جاساۋ تاسىلدەرىن مەڭگەرۋ مەن جالعان اقپاراتپەن كۇرەسۋ تۋرالى پىكىرلەرىمەن ءبولىستى.

كونفەرەنتسياعا وزگە ەلدەردەن قاتىسقان عالىمدار قازىرگى تاڭداعى حالىقارالىق تۇراقتىلىققا فەيك اقپاراتتاردىڭ ىقپالىن باسا ايتتى. قازىرگى گەوساياسي جاعدايدا سەنىمدى، شىنايى اقپارات بەرۋدىڭ ماڭىزدىلىعى، جۋرناليستەردىڭ بىلىكتىلىگى مەن كاسىبي ەتيكانى ساقتاۋى، بولاشاق كاسىبي بىلىكتى ماماندار دايارلاۋداعى وقىتۋ فورماتتارى مەن قۇرالدارى دا نازاردان تىس قالعان جوق.

القالى جيىن حالىقارالىق ۇيىمداردىڭ وكىلدەرى مەن تانىمال مەديا ترەنەرلەردىڭ شەبەرلىك سىنىپتارىنا ۇلاستى.

نازگۇل شىڭعىسوۆا

يۋنەسكو-نىڭ جۋرناليستيكا جانە

كوممۋنيكاتسيا كافەدراسىنىڭ مەڭگەرۋشىسى

ءال-فارابي ات. قازۇۋ