Soğıstağı Marupol'. Foto: The Economic Times

Resey Ukraina jerine qarulı küşpen basıp kirgenine eki ayğa juıqtadı. Soğıs bastalğannan beri Resey küşteri Ukraina oñtüstik-şığısındağı port qala –Mariupol'di tolassız atqılap jatır.  Qazir mine qala Reseydiñ baqılauına ötuge aynalğanı da bayqaladı. Ukraina qarulı küşteri qalada qarsılıqtı tabandı jalğastırıp jatqanın wdayı mälimdep kelse de, soñğı kezderi qalanı Resey tolıqtay baqılauına aluğa aynalğanın moyınday bastadı. Resey ne üşin Mariupol'di aluğa bar küşin salıp jatır? Orıs-ukrain soğısında Mariupol'dıñ qanday mañızı bar?

Mariupol' şayqası turalı BBC jañalıqtarında qaladağı Ukraina äskeri qosındarınıñ oq-därisi tügeuge jaqın qalğanı jäne ekige bölinip qorşauda qalğanı turalı aytılıp jatır. Osı twsta Ukrainadağı Resey qoldauındağı bölşekteuşi küşteri jağınan «Mariupol' bağınudıñ aldında twr» degen mälimdemeler jasalıp jatır.

Mariupol' – Azaulı teñizine (Azov) şığatın port qala jäne Donbass aymağın baqılaudağı asa joğarı strategiyalıq mañızğa ie. Mariupol'di ieleu Resey üşin qanşalıqtı ülken jeñis bolsa, odan ayırılu Ukraina üşin sonşalıqtı ülken joğaltu esepti. Aytalıq, Resey Mariupol'ge ie bolsa Donbass aymağında strategiyalıq basımdıqtıñ bir twtqasına ie boladı; auqımdı äskeri ornalastırulardı Maripupol' arqılı jüzege asıru mümkindigine ie boladı, bılayşa aytqanda port qala arqılı Ukraina jerine bwdan da köp äskerin kirgize aladı. Bwğan qosa Mariuol'di baqılauğa ala alsa Resey Donbass aymağın baqılauda üstimdikke şığa bastaydı. Kieviñ özi Mariupol'di qoldan şığarıp aludıñ qanşalıqtı auır zardap äkeletin aşıq moyındap otır. Osı jäne özge de sebeptermen Resey atalğan şahardı aluğa küşin ayap jatqan joq.

Marupol' joğarı strategiyalıq mañızğa ie qala. Foto: Maps.Google.com

Eñ qiını aydan astam uaqıt qorşauda jäne Reseydiñ tınımsız atqılauındağı qala men qalanıñ beybit twrğındarı auır zardap şekti. Bir Mariupol'diñ özinde qazaq bolğan beybit twrğındar jalpı soğıstağı qaza bolğan beybit twrğındar sanınıñ basım köbin ieleydi.

Mariupol'di qorğağan teñiz jayau äskerleriniñ 36-şı brigadası sekildi ukrainalıq äskeri qosındar ayanbay ayqastı, tabandı şayqastı. Biraq, tınımsız jauğan oq pen tolassız soqqıdan aqırı qorşauğa tüsti. Seysenbide, bir bölim ukraindıq sarbazdar qorşaudı bwzıp şığuğa qam qılğan, alayda 100 şamasındağı bwl sarbazdardıñ jartısınan köbi orıs artilleriyasınan, äue soqqısınan şeyt ketip, 40-qa juıq sarbaz jau qolına tüsip qalğan.  Qazir Mariupol'de qorşauda qalğan sarbazdarında azıq-tülik, su jäne qaru-jaraq pen oq-diri tapşı ekenin Ukraina qarulı küşteri de rastadı.

Osılayşa Ukraina üşin Mariupol' kartinası aur küyde. Resey Mariupol'di tolıq basıp alsa, qazirge deyin qalanı aluğa wyımdastırılğan küşter Donbass aymağı üşin şayqasqa qaytadan jwmıldırıladı da, aymaqtağı qos taraptıñ küş salıstırmasına da äser tepek. Degenmen, Mariupol'di wstap twru üşin de Resey mol äskeri qosındı qaldıruı mümkin degen kisi sendirerlik boljamdar bar.

Bwlarğa qosa Resey qazir Hersonğa da qosımşa küş jiberuge müddeli, üytetini Ukraina küşteri ondağı poziciyaların qaytarıp alu üşin äreketin jandandırdı, äri oñdı nätijelerge qol jetkizip jatır. Al, Kiev bolsa Mariupol'di qalayda saqtaudıñ şaraların köretin bildirdi. Prezident Zelenskiy tipti «Mariupol' – soğıstıñ jüregi» dep atap, onı qolda wstap qaludıñ mañızdı ekenin birneşe ret qaytaladı.

The Qazaq Times