Äl-Farabi atındağı Qazaq wlttıq universitetine Europalıq Parlament delegaciyası arnayı saparmen keldi. Märtebeli meymandar QazWU-dıñ rektorı Janseyit Tüymebaev bastağan oqıtuşı-professorlar qwramı jäne studentterimen kezdesti.

 Europarlament ökilderi aldımen «Äl-Farabi» muzeyin aralap, qara şañıraq tarihına qanıqtı. Sonımen qatar qonaqtarğa QazWU janındağı Pan Gi Mun institutınıñ qızmeti bayandalıp, oqu ornınıñ damu josparı tanıstırıldı.

Delegaciya qwramına «Qazaqstan Respublikası – Europalıq odaq» Parlamenttik ıntımaqtastıq komitetindegi Europalıq Parlament delegaciyasınıñ törağası, Kölik jäne turizm komitetiniñ 3-şi vice-törağası  Andris Ameriks (Latviya), elşi, QR EO ökildiginiñ basşısı Kestutis YAnkauskas, QR-EO Parlamenttik ıntımaqtastıq komitetindegi Europalıq Parlament delegaciyasınıñ müşesi, EP Sırtqı ister komitetiniñ müşesi Francisko Millan-Mon (Ispaniya) jäne basqa da wyım müşeleri kirdi.

QazWU-dıñ rektorı Janseyit Tüymebaev qonaqtarğa arnap söz söyledi. Ol 2010 jıldan bastap Qazaqstan Bolon procesiniñ tolıqqandı müşesi jäne Joğarı bilimniñ europalıq keñistiginiñ qatısuşısı märtebesine ie ekenin atap ötti. Qazirgi uaqıtta ol Bolon procesiniñ baqılau tobınıñ teñ törağası. QazWU älemniñ 500-den astam üzdik jäne jetekşi universitetterimen ıntımaqtastıqta, köptegen iri halıqaralıq wyımdardıñ qwramına kiredi jäne bilim beru bağdarlamaları men ğılımi bağıttarınıñ auqımı asa keñ. 16 qosdiplomdı bilim beru bağdarlaması Euroodaqqa müşe 10 eldiñ joğarı oqu orındarımen birlesip iske asırıluda.  QazWU-dıñ segiz fakul'teti Euroodaq elderiniñ 13 seriktes joğarı oqu ornımen ıntımaqtastıq ornatqan. Universitette 92 bilim beru bağdarlaması ağılşın tilinde oqıtıladı.

Qara şañıraq Birikken Wlttar Wyımınıñ «Akademiyalıq ıqpal etu» bağdarlamasınıñ twraqtılıq jönindegi jahandıq habı retinde maqsattı türde jwmıs istep, oqıtuşı-professorlar qızmetin internacionaldandıru jolımen ğılımi-bilim beru bağdarlamalarınıñ deñgeyin arttıruda.

QazWU-da jekelegen europalıq eldermen ıntımaqtastıq jönindegi ortalıqtar tabıstı jwmıs isteude. Rektor söz soñında: «Biz Qazaqstannıñ Europalıq odaqpen halıqaralıq mädeni-bilim beru ıntımaqtastığın integraciyalau jäne damıtuğa asa müddelimiz. Osılayşa QazWU europalıq eldermen ğılımi zertteulerdi damıtu salasındağı ıntımaqtastıqqa öz ülesin qosadı», – dep, bwl kezdesudiñ özara ıqpaldastıqtı nığayta tüserine zor senim bildirdi.

Öz kezeginde QR-EO Parlamenttik ıntımaqtastıq komitetindegi Europalıq Parlament delegaciyasınıñ birinşi vice-törağası, EP Kölik jäne turizm komitetiniñ 3-şi vice-törağası Andris Ameriks: «Biz ärtürli elderden keldik, biraq bärimiz europalıqpız. Biz birlikten ärtürlilikke deyingi biregey procesterdi birge ötkizudemiz, ortaq biregeylikke iemiz. Biz europalıq wlttardıñ tereñ tarihımen bölisip, Euroodaq qağidaların Qazaqstanğa jetkizu üşin keldik. Kürdeli geosayasi ahualğa qaramastan, negizgi qiındıqtardı eñsere alğan elge barlıq jaqsılıqtı tilegimiz keldi. Sizderdiñ elderiñiz azamattıq qoğamda mañızdı röl atqaratın mädenietaralıq dialog pen adam qwqıqtarın qoldauğa septigin tigizedi dep ümittenemiz», – dep pikir bildirdi.

QR-EO Parlamenttik ıntımaqtastıq komitetindegi Europarlament delegaciyasınıñ müşesi Francisko Millan-Mon jinalğandarğa, äsirese jastarğa Europarlament qızmetine qızığuşılıq tanıtqanı üşin alğısın bildirdi. Ol öz sözinde QazWU jetistikterin joğarı bağaladı. «Universitet şığıstıñ wlı wstazı äl-Farabi mwrasın saqtay bildi, sonımen birge bolaşaqqa senimmen qaraydı, cifrlandıru jwmıstarın jürgizude. Siz halıqaralıq universitettermen tığız baylanıs ornıqqanı turalı, europalıq örkeniet qağidaları men BWW qwndılıqtarı jayında bayandadıñız. Ortalıq Aziyada ğana emes, sonımen qatar Euroodaq elderine de tanımal universitetke tolağay tabıstar tileymin», – degen lebizin jetkizdi.

Sonday-aq jüzdesuge QR Parlamenti Mäjilisiniñ Halıqaralıq ister, qorğanıs jäne qauipsizdik komitetiniñ törayımı Aygül Qwspan qatısıp, Euroodaq jwmısına körsetken qızığuşılıq üşin alğısın jetkizdi.

Kezdesu barısında student jastar swraqtar qoyıp, delegaciya müşelerinen twşımdı jauaptar aldı. Qatısuşılar özara ıqpaldastıqtıñ perspektivalıq bağıttarı turalı oy bölisip, ıntımaqtastıqtıñ mañızdı mäseleleri boyınşa pikir almastı.

Qalamqas Jasanğalieva