ءال-فارابي اتىنداعى قازاق ۇلتتىق ۋنيۆەرسيتەتىنە ەۋروپالىق پارلامەنت دەلەگاتسياسى ارنايى ساپارمەن كەلدى. مارتەبەلى مەيماندار قازۇۋ-دىڭ رەكتورى جانسەيىت تۇيمەباەۆ باستاعان وقىتۋشى-پروفەسسورلار قۇرامى جانە ستۋدەنتتەرىمەن كەزدەستى.

 ەۋروپارلامەنت وكىلدەرى الدىمەن «ءال-فارابي» مۋزەيىن ارالاپ، قارا شاڭىراق تاريحىنا قانىقتى. سونىمەن قاتار قوناقتارعا قازۇۋ جانىنداعى پان گي مۋن ينستيتۋتىنىڭ قىزمەتى باياندالىپ، وقۋ ورنىنىڭ دامۋ جوسپارى تانىستىرىلدى.

دەلەگاتسيا قۇرامىنا «قازاقستان رەسپۋبليكاسى – ەۋروپالىق وداق» پارلامەنتتىك ىنتىماقتاستىق كوميتەتىندەگى ەۋروپالىق پارلامەنت دەلەگاتسياسىنىڭ توراعاسى، كولىك جانە تۋريزم كوميتەتىنىڭ 3-ءشى ۆيتسە-توراعاسى  اندريس امەريكس (لاتۆيا), ەلشى، قر ەو وكىلدىگىنىڭ باسشىسى كەستۋتيس يانكاۋسكاس، قر-ەو پارلامەنتتىك ىنتىماقتاستىق كوميتەتىندەگى ەۋروپالىق پارلامەنت دەلەگاتسياسىنىڭ مۇشەسى، ەپ سىرتقى ىستەر كوميتەتىنىڭ مۇشەسى فرانتسيسكو ميللان-مون (يسپانيا) جانە باسقا دا ۇيىم مۇشەلەرى كىردى.

قازۇۋ-دىڭ رەكتورى جانسەيىت تۇيمەباەۆ قوناقتارعا ارناپ ءسوز سويلەدى. ول 2010 جىلدان باستاپ قازاقستان بولون پروتسەسىنىڭ تولىققاندى مۇشەسى جانە جوعارى ءبىلىمنىڭ ەۋروپالىق كەڭىستىگىنىڭ قاتىسۋشىسى مارتەبەسىنە يە ەكەنىن اتاپ ءوتتى. قازىرگى ۋاقىتتا ول بولون پروتسەسىنىڭ باقىلاۋ توبىنىڭ تەڭ توراعاسى. قازۇۋ الەمنىڭ 500-دەن استام ۇزدىك جانە جەتەكشى ۋنيۆەرسيتەتتەرىمەن ىنتىماقتاستىقتا، كوپتەگەن ءىرى حالىقارالىق ۇيىمداردىڭ قۇرامىنا كىرەدى جانە ءبىلىم بەرۋ باعدارلامالارى مەن عىلىمي باعىتتارىنىڭ اۋقىمى اسا كەڭ. 16 قوسديپلومدى ءبىلىم بەرۋ باعدارلاماسى ەۋرووداققا مۇشە 10 ەلدىڭ جوعارى وقۋ ورىندارىمەن بىرلەسىپ ىسكە اسىرىلۋدا.  قازۇۋ-دىڭ سەگىز فاكۋلتەتى ەۋرووداق ەلدەرىنىڭ 13 سەرىكتەس جوعارى وقۋ ورنىمەن ىنتىماقتاستىق ورناتقان. ۋنيۆەرسيتەتتە 92 ءبىلىم بەرۋ باعدارلاماسى اعىلشىن تىلىندە وقىتىلادى.

قارا شاڭىراق بىرىككەن ۇلتتار ۇيىمىنىڭ «اكادەميالىق ىقپال ەتۋ» باعدارلاماسىنىڭ تۇراقتىلىق جونىندەگى جاھاندىق حابى رەتىندە ماقساتتى تۇردە جۇمىس ىستەپ، وقىتۋشى-پروفەسسورلار قىزمەتىن ينتەرناتسيونالداندىرۋ جولىمەن عىلىمي-ءبىلىم بەرۋ باعدارلامالارىنىڭ دەڭگەيىن ارتتىرۋدا.

قازۇۋ-دا جەكەلەگەن ەۋروپالىق ەلدەرمەن ىنتىماقتاستىق جونىندەگى ورتالىقتار تابىستى جۇمىس ىستەۋدە. رەكتور ءسوز سوڭىندا: «ءبىز قازاقستاننىڭ ەۋروپالىق وداقپەن حالىقارالىق مادەني-ءبىلىم بەرۋ ىنتىماقتاستىعىن ينتەگراتسيالاۋ جانە دامىتۋعا اسا مۇددەلىمىز. وسىلايشا قازۇۋ ەۋروپالىق ەلدەرمەن عىلىمي زەرتتەۋلەردى دامىتۋ سالاسىنداعى ىنتىماقتاستىققا ءوز ۇلەسىن قوسادى»، – دەپ، بۇل كەزدەسۋدىڭ ءوزارا ىقپالداستىقتى نىعايتا تۇسەرىنە زور سەنىم ءبىلدىردى.

ءوز كەزەگىندە قر-ەو پارلامەنتتىك ىنتىماقتاستىق كوميتەتىندەگى ەۋروپالىق پارلامەنت دەلەگاتسياسىنىڭ ءبىرىنشى ۆيتسە-توراعاسى، ەپ كولىك جانە تۋريزم كوميتەتىنىڭ 3-ءشى ۆيتسە-توراعاسى اندريس امەريكس: «ءبىز ءارتۇرلى ەلدەردەن كەلدىك، بىراق ءبارىمىز ەۋروپالىقپىز. ءبىز بىرلىكتەن ارتۇرلىلىككە دەيىنگى بىرەگەي پروتسەستەردى بىرگە وتكىزۋدەمىز، ورتاق بىرەگەيلىككە يەمىز. ءبىز ەۋروپالىق ۇلتتاردىڭ تەرەڭ تاريحىمەن ءبولىسىپ، ەۋرووداق قاعيدالارىن قازاقستانعا جەتكىزۋ ءۇشىن كەلدىك. كۇردەلى گەوساياسي احۋالعا قاراماستان، نەگىزگى قيىندىقتاردى ەڭسەرە العان ەلگە بارلىق جاقسىلىقتى تىلەگىمىز كەلدى. سىزدەردىڭ ەلدەرىڭىز ازاماتتىق قوعامدا ماڭىزدى ءرول اتقاراتىن مادەنيەتارالىق ديالوگ پەن ادام قۇقىقتارىن قولداۋعا سەپتىگىن تيگىزەدى دەپ ۇمىتتەنەمىز»، – دەپ پىكىر ءبىلدىردى.

قر-ەو پارلامەنتتىك ىنتىماقتاستىق كوميتەتىندەگى ەۋروپارلامەنت دەلەگاتسياسىنىڭ مۇشەسى فرانتسيسكو ميللان-مون جينالعاندارعا، اسىرەسە جاستارعا ەۋروپارلامەنت قىزمەتىنە قىزىعۋشىلىق تانىتقانى ءۇشىن العىسىن ءبىلدىردى. ول ءوز سوزىندە قازۇۋ جەتىستىكتەرىن جوعارى باعالادى. «ۋنيۆەرسيتەت شىعىستىڭ ۇلى ۇستازى ءال-فارابي مۇراسىن ساقتاي ءبىلدى، سونىمەن بىرگە بولاشاققا سەنىممەن قارايدى، تسيفرلاندىرۋ جۇمىستارىن جۇرگىزۋدە. ءسىز حالىقارالىق ۋنيۆەرسيتەتتەرمەن تىعىز بايلانىس ورنىققانى تۋرالى، ەۋروپالىق وركەنيەت قاعيدالارى مەن بۇۇ قۇندىلىقتارى جايىندا باياندادىڭىز. ورتالىق ازيادا عانا ەمەس، سونىمەن قاتار ەۋرووداق ەلدەرىنە دە تانىمال ۋنيۆەرسيتەتكە تولاعاي تابىستار تىلەيمىن»، – دەگەن لەبىزىن جەتكىزدى.

سونداي-اق جۇزدەسۋگە قر پارلامەنتى ءماجىلىسىنىڭ حالىقارالىق ىستەر، قورعانىس جانە قاۋىپسىزدىك كوميتەتىنىڭ ءتورايىمى ايگۇل قۇسپان قاتىسىپ، ەۋرووداق جۇمىسىنا كورسەتكەن قىزىعۋشىلىق ءۇشىن العىسىن جەتكىزدى.

كەزدەسۋ بارىسىندا ستۋدەنت جاستار سۇراقتار قويىپ، دەلەگاتسيا مۇشەلەرىنەن تۇشىمدى جاۋاپتار الدى. قاتىسۋشىلار ءوزارا ىقپالداستىقتىڭ پەرسپەكتيۆالىق باعىتتارى تۋرالى وي ءبولىسىپ، ىنتىماقتاستىقتىڭ ماڭىزدى ماسەلەلەرى بويىنشا پىكىر الماستى.

قالامقاس جاسانعاليەۆا