Bayden mingen wşaq Bryussel'ge jetip, Europa saparın bastadı. Foto: AP

AQŞ Qıtaydıñ Reseyge sankciyadan jaltaruğa kömektesuin barınşa boldırmauğa tırısıp jatır. AQŞ prezidenti Jo Bayden otırğan Air Force One Bryussel'ge qonudan bwrın Uaşington Beyjiñge qarata mälimdeme jasap Reseyge qarsı sankciyalar tudırğan sauda orayına qızıqpaudı eskertti. Bılayşa aytqanda, Reseyge degen eksporttıq baqılaudı bwzbauğa, sankciyalanğan qarjılıq operaciyalarına kömektespeuge şaqırdı.

AQŞ prezidenti keşe Bryussel'ge jetip Europadağı saparın bastap ketti. Bügin jäne erteñ NATO men «Ülken jetilik» sammitin qamtığan asa mañızdı birqatar kezdesuge qatısadı. Baydenniñ wlttıq qauipsizdik jönindegi keñesşisi Jek Sallivan keşegi mälimdemesinde bügin ötip jatqan «Ülken jetilik» sammitinde Reseyge salınğan sankciyağa qanday bir eldiñ kömektesuine jol bermeu üşin ortaq jauap dayındalatının aytqan.

Sallivannıñ aytuınşa AQŞ pen onıñ odaqtas-seriktesteri maqsattı jasağan sankciyalardı bwzu auır zardap äkeledi. Bwl eskertu bir ğana Qıtayğa qaratılmağanın da qosımşalağan Sallivan kez-kelgen eldiñ nemese iri ekonomikalardıñ Reseyge qarsı sankciyalardı bwzbauın qamtamasız etu üşin «Ülken jetilik» sammitinde şeşim qabıldanbaq. Anığında Qwrama Ştattar «Ülken jetiliktegi» özge äriptesterin de osığan köndirmek.

Qwrama Ştattardıñ Qıtayğa qayta-qayta eskertu jasap jatuınıñ özindik sebebi de bar. Bwl bir jağınan Qıtay men Reseydiñ özara ıntımaqtasuınan alañdauşılıq deuge de boladı. Eger Batıs Reseydi jan-jaqtı qwrsauğa alğan kezde Qıtay öziniñ qarjılıq-ekonomikalıq mümkindikterinen paydalanıp Mäskeudiñ sankciyadan jaltaruına qoldau körsetse, bwl AQŞ bastağan NATO elderiniñ, tipti twtas demokratiyalıq älemniñ Resey men Qıtayğa qarsı küresudegi erik-jigerine auır soqqı jasaydı.

Qazir Qıtaydıñ Reseyge qoldau körsetui men körsetpeui äli de beymälim äri şeşuşi mäsele küyinde twr. Ötken aptada Baydenmen beyne konferenciya ötkizgen Şi Jınpıñ (Si Czin'pin) birjaqtı sankciyalardı ayıptay söyledi, äri sankciyalardıñ saldarı halıqqa tietinin alğa tarttı. Qazirge deyin Beyjiñ Mäskeudiñ Ukrainağa qarsı şabuılın ayıptağan emes nemese aşıq qoldaytının da bildirmedi.

Keybir sarapşılar Beyjiñ wstanımın anıq körsetti, Reseydi qoldamaydı jäne beytarap poziciyasında qaladı dep sanaydı. Degenmen, bwl soñğı nätije bolması anıq, sebebi Qıtay äli de öziniñ özektiligi men mañızın müddelik saudağa salu üşin şeşim qabıldaudıñ uaqıtın soza tüsui mümkin. Ötken ğasırda da AQŞ bastağan kapitalistik lager socialistik lagerdi bölip tastau üşin Qıtay men Keñes odağına eki türli mämile jasap, Mäskeudi oqşaulau üşin Beyjiñdi özine tartqan bolatın.

The Qazaq Times