بايدەن مىنگەن ۇشاق بريۋسسەلگە جەتىپ، ەۋروپا ساپارىن باستادى. فوتو: AP

اقش قىتايدىڭ رەسەيگە سانكتسيادان جالتارۋعا كومەكتەسۋىن بارىنشا بولدىرماۋعا تىرىسىپ جاتىر. اقش پرەزيدەنتى جو بايدەن وتىرعان Air Force One بريۋسسەلگە قونۋدان بۇرىن ۋاشينگتون بەيجىڭگە قاراتا مالىمدەمە جاساپ رەسەيگە قارسى سانكتسيالار تۋدىرعان ساۋدا ورايىنا قىزىقپاۋدى ەسكەرتتى. بىلايشا ايتقاندا، رەسەيگە دەگەن ەكسپورتتىق باقىلاۋدى بۇزباۋعا، سانكتسيالانعان قارجىلىق وپەراتسيالارىنا كومەكتەسپەۋگە شاقىردى.

اقش پرەزيدەنتى كەشە بريۋسسەلگە جەتىپ ەۋروپاداعى ساپارىن باستاپ كەتتى. بۇگىن جانە ەرتەڭ ناتو مەن «ۇلكەن جەتىلىك» ءسامميتىن قامتىعان اسا ماڭىزدى بىرقاتار كەزدەسۋگە قاتىسادى. بايدەننىڭ ۇلتتىق قاۋىپسىزدىك جونىندەگى كەڭەسشىسى جەك سالليۆان كەشەگى مالىمدەمەسىندە بۇگىن ءوتىپ جاتقان «ۇلكەن جەتىلىك» سامميتىندە رەسەيگە سالىنعان سانكتسياعا قانداي ءبىر ەلدىڭ كومەكتەسۋىنە جول بەرمەۋ ءۇشىن ورتاق جاۋاپ دايىندالاتىنىن ايتقان.

سالليۆاننىڭ ايتۋىنشا اقش پەن ونىڭ وداقتاس-سەرىكتەستەرى ماقساتتى جاساعان سانكتسيالاردى بۇزۋ اۋىر زارداپ اكەلەدى. بۇل ەسكەرتۋ ءبىر عانا قىتايعا قاراتىلماعانىن دا قوسىمشالاعان سالليۆان كەز-كەلگەن ەلدىڭ نەمەسە ءىرى ەكونوميكالاردىڭ رەسەيگە قارسى سانكتسيالاردى بۇزباۋىن قامتاماسىز ەتۋ ءۇشىن «ۇلكەن جەتىلىك» سامميتىندە شەشىم قابىلدانباق. انىعىندا قۇراما شتاتتار «ۇلكەن جەتىلىكتەگى» وزگە ارىپتەستەرىن دە وسىعان كوندىرمەك.

قۇراما شتاتتاردىڭ قىتايعا قايتا-قايتا ەسكەرتۋ جاساپ جاتۋىنىڭ وزىندىك سەبەبى دە بار. بۇل ءبىر جاعىنان قىتاي مەن رەسەيدىڭ ءوزارا ىنتىماقتاسۋىنان الاڭداۋشىلىق دەۋگە دە بولادى. ەگەر باتىس رەسەيدى جان-جاقتى قۇرساۋعا العان كەزدە قىتاي ءوزىنىڭ قارجىلىق-ەكونوميكالىق مۇمكىندىكتەرىنەن پايدالانىپ ماسكەۋدىڭ سانكتسيادان جالتارۋىنا قولداۋ كورسەتسە، بۇل اقش باستاعان ناتو ەلدەرىنىڭ، ءتىپتى تۇتاس دەموكراتيالىق الەمنىڭ رەسەي مەن قىتايعا قارسى كۇرەسۋدەگى ەرىك-جىگەرىنە اۋىر سوققى جاسايدى.

قازىر قىتايدىڭ رەسەيگە قولداۋ كورسەتۋى مەن كورسەتپەۋى ءالى دە بەيمالىم ءارى شەشۋشى ماسەلە كۇيىندە تۇر. وتكەن اپتادا بايدەنمەن بەينە كونفەرەنتسيا وتكىزگەن شي جىنپىڭ (سي تسزينپين) بىرجاقتى سانكتسيالاردى ايىپتاي سويلەدى، ءارى سانكتسيالاردىڭ سالدارى حالىققا تيەتىنىن العا تارتتى. قازىرگە دەيىن بەيجىڭ ماسكەۋدىڭ ۋكرايناعا قارسى شابۋىلىن ايىپتاعان ەمەس نەمەسە اشىق قولدايتىنىن دا بىلدىرمەدى.

كەيبىر ساراپشىلار بەيجىڭ ۇستانىمىن انىق كورسەتتى، رەسەيدى قولدامايدى جانە بەيتاراپ پوزيتسياسىندا قالادى دەپ سانايدى. دەگەنمەن، بۇل سوڭعى ناتيجە بولماسى انىق، سەبەبى قىتاي ءالى دە ءوزىنىڭ وزەكتىلىگى مەن ماڭىزىن مۇددەلىك ساۋداعا سالۋ ءۇشىن شەشىم قابىلداۋدىڭ ۋاقىتىن سوزا ءتۇسۋى مۇمكىن. وتكەن عاسىردا دا اقش باستاعان كاپيتاليستىك لاگەر سوتسياليستىك لاگەردى ءبولىپ تاستاۋ ءۇشىن قىتاي مەن كەڭەس وداعىنا ەكى ءتۇرلى مامىلە جاساپ، ماسكەۋدى وقشاۋلاۋ ءۇشىن بەيجىڭدى وزىنە تارتقان بولاتىن.

The Qazaq Times