Qazaqstannıñ Ukrainadağı tötenşe jäne ökiletti elşisi Darhan Qaletaev Azattıq tilşisine qazaqstandıqtardı evakuaciyalau joldarı turalı ayttı. Onıñ sözine qarağanda, Ukrainanıñ äue keñistigi jabıq, sondıqtan elşilik basqa joldı qarastırıp jatır, dep habarladı Ortalıq Aziya jañalqıtar qızmeti.

- Äuejay izdep jatırmız. Qay jerge Air Astana'nıñ wşağı qonatın mümkindik barın anıqtau kerek. Belarus'pen şekara jabıq. Moldovağa avtokölik jolı Odessa arqılı baratındıqtan qauipti. Ol jerlerde soğıs bolıp jatır. Eñ qauipsizi L'vov qalası, azamattarğa sol jaqqa barudı wsınıp jatırmız. Arı qaray Pol'şa ne Vengriyağa şığaruğa tırısamız. Azamattardıñ Europa elderine vizası joq, sondıqtan qay memleket bizge jasıl koridor bere alatınına baylanıstı. Äzirge jospar osınday, – dedi elşi.

Elşiniñ sözinşe, Kiev köşelerinde keptelis, twrğındarda dürligu bar. Soğan qaramastan elşilik jwmıs istep twr. Qazir elşilik ğimaratında Qazaqstannıñ 30 şaqtı azamatı bar. Ukrainadağı Qazaqstan elşiliginiñ mälimetinşe, 2 mıñday azamat konsuldıq tirkeude twr.

24 aqpanda tañerteñ Qazaqstan sırtqı ister ministrliginiñ resmi ökili Aybek Smadiyarov Ukrainadağı qazaqstandıqtardı evakuaciyalau amaldarın qarastırıp jatqanın habarlağan.

Beysenbi küni kündiz Kiev oblısında twratın qazaqstandıq oppoziciya belsendisi Vladimir Kozlov Azattıqqa elşilikten evakuaciya jaylı habar tüsti, biraq uaqıtı men ornın naqtılamadı dep aytqan.

Özbekstannıñ Kievtegi elşiligi de Ukrainadan ketkisi keletin azamattardıñ tizimin jasap, olardı evakuaciyalau josparın jasap jatır.

Özbekstan elşiligi evakuaciyalau jolın www.uzbekistan.org.ua saytı arqılı jäne äleumettik jeliler arqılı habarlaytının jetkizdi. Sonımen birge azamattarın embassy@uzbekistan.org.ua poştasına habarlasuın swraydı.