قازاقستاننىڭ ۋكرايناداعى توتەنشە جانە وكىلەتتى ەلشىسى دارحان قالەتاەۆ ازاتتىق تىلشىسىنە قازاقستاندىقتاردى ەۆاكۋاتسيالاۋ جولدارى تۋرالى ايتتى. ونىڭ سوزىنە قاراعاندا، ۋكراينانىڭ اۋە كەڭىستىگى جابىق، سوندىقتان ەلشىلىك باسقا جولدى قاراستىرىپ جاتىر، دەپ حابارلادى ورتالىق ازيا جاڭالقىتار قىزمەتى.

- اۋەجاي ىزدەپ جاتىرمىز. قاي جەرگە Air Astana'نىڭ ۇشاعى قوناتىن مۇمكىندىك بارىن انىقتاۋ كەرەك. بەلارۋسپەن شەكارا جابىق. مولدوۆاعا اۆتوكولىك جولى ودەسسا ارقىلى باراتىندىقتان قاۋىپتى. ول جەرلەردە سوعىس بولىپ جاتىر. ەڭ قاۋىپسىزى لۆوۆ قالاسى، ازاماتتارعا سول جاققا بارۋدى ۇسىنىپ جاتىرمىز. ارى قاراي پولشا نە ۆەنگرياعا شىعارۋعا تىرىسامىز. ازاماتتاردىڭ ەۋروپا ەلدەرىنە ۆيزاسى جوق، سوندىقتان قاي مەملەكەت بىزگە جاسىل كوريدور بەرە الاتىنىنا بايلانىستى. ازىرگە جوسپار وسىنداي، – دەدى ەلشى.

ەلشىنىڭ سوزىنشە، كيەۆ كوشەلەرىندە كەپتەلىس، تۇرعىنداردا دۇرلىگۋ بار. سوعان قاراماستان ەلشىلىك جۇمىس ىستەپ تۇر. قازىر ەلشىلىك عيماراتىندا قازاقستاننىڭ 30 شاقتى ازاماتى بار. ۋكرايناداعى قازاقستان ەلشىلىگىنىڭ مالىمەتىنشە، 2 مىڭداي ازامات كونسۋلدىق تىركەۋدە تۇر.

24 اقپاندا تاڭەرتەڭ قازاقستان سىرتقى ىستەر مينيسترلىگىنىڭ رەسمي وكىلى ايبەك سمادياروۆ ۋكرايناداعى قازاقستاندىقتاردى ەۆاكۋاتسيالاۋ امالدارىن قاراستىرىپ جاتقانىن حابارلاعان.

بەيسەنبى كۇنى كۇندىز كيەۆ وبلىسىندا تۇراتىن قازاقستاندىق وپپوزيتسيا بەلسەندىسى ۆلاديمير كوزلوۆ ازاتتىققا ەلشىلىكتەن ەۆاكۋاتسيا جايلى حابار ءتۇستى، بىراق ۋاقىتى مەن ورنىن ناقتىلامادى دەپ ايتقان.

وزبەكستاننىڭ كيەۆتەگى ەلشىلىگى دە ۋكراينادان كەتكىسى كەلەتىن ازاماتتاردىڭ ءتىزىمىن جاساپ، ولاردى ەۆاكۋاتسيالاۋ جوسپارىن جاساپ جاتىر.

وزبەكستان ەلشىلىگى ەۆاكۋاتسيالاۋ جولىن www.uzbekistan.org.ua سايتى ارقىلى جانە الەۋمەتتىك جەلىلەر ارقىلى حابارلايتىنىن جەتكىزدى. سونىمەن بىرگە ازاماتتارىن embassy@uzbekistan.org.ua پوشتاسىنا حابارلاسۋىن سۇرايدى.