1 aqpanda mäjilis törağası Nwrlan Nığmatulinniñ deputattıq ökileti toqtatıldı. Onıñ ornına parlamenttiñ tömengi palatasınıñ törağası bolıp Erlan Qoşanov saylandı. Ortalıq saylau komissiyası seysenbi küni onı mäjilis deputatı retinde tirkedi. Bwl turalı Ortalıq Aziya jañalıqtar qızmeti jazdı.

Mäjilistiñ otırısınan tikeley translyaciya jürgizilgen joq. Aqparatqa qarağanda, deputattar mäjilis törağası kandidatına qwpiya türde dauıs bergen. Barlığı Qoşanov kandidaturasın bir auızdan maqwldağan.

Al seysenbi küni deputattıq ökileti toqtatılğan Nwrlan Nığmatulin otırısta söylegen sözinde öz erkimen ötiniş bergenin aytıp, äriptesterine, bwrınğı prezident Nwrswltan Nazarbaev pen qazirgi prezident Qasım-Jomart Toqaevqa "lauazımdı qızmetterdi senip tapsırğanı üşin" alğıs ayttı.

Ol mäjilistiñ üş şaqırılımında spiker bolğan. Ol qwqıq qorğauşılar men belsendiler sınağan bıltırğı parlament saylauınan keyin qañtar ayında mäjilis törağası bolıp qayta bekitilgen edi.

Qoşanov bwğan deyin prezident äkimşiligine jetekşilik etken. Äzirge prezident äkimşiliginiñ jetekşisi bolıp kimniñ tağayındalatını belgisiz.

60 jastağı Erlan Qoşanov 2019 jıldıñ qırküyek ayınan beri prezident äkimşiliginiñ törağası bolğan. Mäjilistiñ üş şaqırılımına (2011, 2016 jäne 2020 jıl) "Nwr Otan" partiyası atınan deputat bolıp saylanğan. 2017-2019 jıldarı aralığında Qarağandı oblısınıñ äkimi boldı. Mamandığı boyınşa injener-mehanik.

Qañtar oqiğasınan keyin Qazaqstanda birqatar kadrlıq auıs-tüyister boldı. Oqiğa kezinde Wlttıq qauipsizdik komitetiniñ basşılığı auıstı. 12 qañtarda ükimet qaytadan bekitildi. Bir kün bwrın Almatı qalasınıñ äkimi bolıp Wlttıq banktiñ bwrınğı törağası Erbolat Dosaev tağayındaldı.

Baqıtjan Sağıntaev otstavkağa ketti. Keybir sarapşılar bilikke sın köbeygen şaqta Aqorda birqatar kadrlardı auıstırıp, özgeris jasağanday keyip tanıtıp otır, şın mäninde Nazarbaev kezeñindegi şeneunikter bir-birimen orın almastırdı, jağday özgermeydi dep sanaydı.