1 اقپاندا ءماجىلىس توراعاسى نۇرلان نىعماتۋليننىڭ دەپۋتاتتىق وكىلەتى توقتاتىلدى. ونىڭ ورنىنا پارلامەنتتىڭ تومەنگى پالاتاسىنىڭ توراعاسى بولىپ ەرلان قوشانوۆ سايلاندى. ورتالىق سايلاۋ كوميسسياسى سەيسەنبى كۇنى ونى ءماجىلىس دەپۋتاتى رەتىندە تىركەدى. بۇل تۋرالى ورتالىق ازيا جاڭالىقتار قىزمەتى جازدى.

ءماجىلىستىڭ وتىرىسىنان تىكەلەي ترانسلياتسيا جۇرگىزىلگەن جوق. اقپاراتقا قاراعاندا، دەپۋتاتتار ءماجىلىس توراعاسى كانديداتىنا قۇپيا تۇردە داۋىس بەرگەن. بارلىعى قوشانوۆ كانديداتۋراسىن ءبىر اۋىزدان ماقۇلداعان.

ال سەيسەنبى كۇنى دەپۋتاتتىق وكىلەتى توقتاتىلعان نۇرلان نىعماتۋلين وتىرىستا سويلەگەن سوزىندە ءوز ەركىمەن ءوتىنىش بەرگەنىن ايتىپ، ارىپتەستەرىنە، بۇرىنعى پرەزيدەنت نۇرسۇلتان نازارباەۆ پەن قازىرگى پرەزيدەنت قاسىم-جومارت توقاەۆقا "لاۋازىمدى قىزمەتتەردى سەنىپ تاپسىرعانى ءۇشىن" العىس ايتتى.

ول ءماجىلىستىڭ ءۇش شاقىرىلىمىندا سپيكەر بولعان. ول قۇقىق قورعاۋشىلار مەن بەلسەندىلەر سىناعان بىلتىرعى پارلامەنت سايلاۋىنان كەيىن قاڭتار ايىندا ءماجىلىس توراعاسى بولىپ قايتا بەكىتىلگەن ەدى.

قوشانوۆ بۇعان دەيىن پرەزيدەنت اكىمشىلىگىنە جەتەكشىلىك ەتكەن. ازىرگە پرەزيدەنت اكىمشىلىگىنىڭ جەتەكشىسى بولىپ كىمنىڭ تاعايىندالاتىنى بەلگىسىز.

60 جاستاعى ەرلان قوشانوۆ 2019 جىلدىڭ قىركۇيەك ايىنان بەرى پرەزيدەنت اكىمشىلىگىنىڭ توراعاسى بولعان. ءماجىلىستىڭ ءۇش شاقىرىلىمىنا (2011, 2016 جانە 2020 جىل) "نۇر وتان" پارتياسى اتىنان دەپۋتات بولىپ سايلانعان. 2017-2019 جىلدارى ارالىعىندا قاراعاندى وبلىسىنىڭ اكىمى بولدى. ماماندىعى بويىنشا ينجەنەر-مەحانيك.

قاڭتار وقيعاسىنان كەيىن قازاقستاندا بىرقاتار كادرلىق اۋىس-تۇيىستەر بولدى. وقيعا كەزىندە ۇلتتىق قاۋىپسىزدىك كوميتەتىنىڭ باسشىلىعى اۋىستى. 12 قاڭتاردا ۇكىمەت قايتادان بەكىتىلدى. ءبىر كۇن بۇرىن الماتى قالاسىنىڭ اكىمى بولىپ ۇلتتىق بانكتىڭ بۇرىنعى توراعاسى ەربولات دوساەۆ تاعايىندالدى.

باقىتجان ساعىنتاەۆ وتستاۆكاعا كەتتى. كەيبىر ساراپشىلار بيلىككە سىن كوبەيگەن شاقتا اقوردا بىرقاتار كادرلاردى اۋىستىرىپ، وزگەرىس جاساعانداي كەيىپ تانىتىپ وتىر، شىن مانىندە نازارباەۆ كەزەڭىندەگى شەنەۋنىكتەر ءبىر-بىرىمەن ورىن الماستىردى، جاعداي وزگەرمەيدى دەپ سانايدى.