Blinken men Lavrov aşıq sın-pikir ayttı. Foto: Foreign Policy

Şveciyanıñ Stokgol'm qalasında kezdesken AQŞ pen Reseydiñ SİM basşıları Ukraina şekarasındağı jağdayğa baylanıstı bir-birin qatañ sın-pikirdiñ astına aldı. Biri şekarağa äsker toptap, Ukraina mäselesin qiındattı dese, endi biri NATO Şığıs Europada artıq qimıl jasap jatır desti. Sarapşılar Uaşington men Mäskeu ortasındağı bwl jağdaydı «qauipti äskeri tiresudiñ bastaluı» dep sipattap jatır.

Rasında da Ukraina şekarasındağı jağdayğa baylanıstı Batıs pen Mäskeudiñ pikiri qarama-qayşı. Batıs elderi Reseydiñ Ukrainağa jaqın şekara mañında 100 mıñğa juıq äskerlerin toptap, auqımdı basıp kiruge dayındalıp jatır dep qauiptenedi. Al, Mäskeu bolsa NATO Şığıs Europada öziniñ wlttıq qauipsizdigine qater töndirude jäne Minsk Donbass mäselesin qarulı küşpen şeşuge äreket etip otır dep sanaydı.

Stokgol'mdağı kezdesude AQŞ memlekettik hatşısı Blinken Uaşingtonnıñ alañdauşılığın jetkize otırıp, Mäskeu Resey-Ukraina mäselesin jalğastı dağdarısqa keptey beretin bolsa qatañ sankciyalarğa tap bolatının aytıp saldı.

«Dağdarıstıñ bir ğana tiimdi jolı – Diplomatiya. Resey Minisk kelisimin orındap, Ukraina şekarasına jaqın mañdağı qarulı küşterin şığarıp ketui kerek. Qwrama Ştattar Donbasstağı qarulı qaqtığıstı kelissözben şeşuge qatısuğa dayın. Aşığın aytar bolsaq, eger Resey tiresudi jalğastıra beretin bolsa, bwnıñ soñı auır apatqa alıp keledi», – dedi Blinken kezdesude.

Resey bas diplomatı Sergey Lavrovtıñ da pikiri qatañ boldı, onıñ aytuınşa NATO Reseydiñ wlttıq müddesin eskerusiz qayırıp qoyıp, Ukrainağa äskeri kömek körsetudi jalğastırıp otır. «Äskeri tiresudiñ eñ naşar scenariyi payda boluda. Ukraina mäselesi tolassız şieleniske ketip jatır, alyanstıñ äskeri keşenderi Reseyge jaqınday tüsti. Rumıniya men Pol'şada zımıranğa qarısı jüyeler ornatıla bastadı. Amerikalıq orta qaşıqtıqqa atılatın zımırandarı Europada payda bolu aldında twradı. Resey eşqanday konfliktti qalamaydı», – dedi Sergey Lavrov.

AQŞ, Resey, Ukraina jäne EQIW sırtqı ister ministrleri arasındağı kezdesude qazirgi jağdayğa baylanıstı talqı qayım aytısqa wlasqanın Ukraina basılımdarı jazıp jatır. Taraptardıñ kezdesuinen keyin sarapşılar Resey men Batıs arasındağı äskeri tires tipti de örşip, qauipti qarsılasuğa ketip qaluı da mümkin degen alañdauşılıqtar bildirude.

The Qazaq Times