بلينكەن مەن لاۆروۆ اشىق سىن-پىكىر ايتتى. فوتو: Foreign Policy

شۆەتسيانىڭ ستوكگولم قالاسىندا كەزدەسكەن اقش پەن رەسەيدىڭ ءسىم باسشىلارى ۋكراينا شەكاراسىنداعى جاعدايعا بايلانىستى ءبىر-ءبىرىن قاتاڭ سىن-پىكىردىڭ استىنا الدى. ءبىرى شەكاراعا اسكەر توپتاپ، ۋكراينا ماسەلەسىن قيىنداتتى دەسە، ەندى ءبىرى ناتو شىعىس ەۋروپادا ارتىق قيمىل جاساپ جاتىر دەستى. ساراپشىلار ۋاشينگتون مەن ماسكەۋ ورتاسىنداعى بۇل جاعدايدى «قاۋىپتى اسكەري تىرەسۋدىڭ باستالۋى» دەپ سيپاتتاپ جاتىر.

راسىندا دا ۋكراينا شەكاراسىنداعى جاعدايعا بايلانىستى باتىس پەن ماسكەۋدىڭ پىكىرى قاراما-قايشى. باتىس ەلدەرى رەسەيدىڭ ۋكرايناعا جاقىن شەكارا ماڭىندا 100 مىڭعا جۋىق اسكەرلەرىن توپتاپ، اۋقىمدى باسىپ كىرۋگە دايىندالىپ جاتىر دەپ قاۋىپتەنەدى. ال، ماسكەۋ بولسا ناتو شىعىس ەۋروپادا ءوزىنىڭ ۇلتتىق قاۋىپسىزدىگىنە قاتەر توندىرۋدە جانە مينسك دونباسس ماسەلەسىن قارۋلى كۇشپەن شەشۋگە ارەكەت ەتىپ وتىر دەپ سانايدى.

ستوكگولمداعى كەزدەسۋدە اقش مەملەكەتتىك حاتشىسى بلينكەن ۋاشينگتوننىڭ الاڭداۋشىلىعىن جەتكىزە وتىرىپ، ماسكەۋ رەسەي-ۋكراينا ماسەلەسىن جالعاستى داعدارىسقا كەپتەي بەرەتىن بولسا قاتاڭ سانكتسيالارعا تاپ بولاتىنىن ايتىپ سالدى.

«داعدارىستىڭ ءبىر عانا ءتيىمدى جولى – ديپلوماتيا. رەسەي مينيسك كەلىسىمىن ورىنداپ، ۋكراينا شەكاراسىنا جاقىن ماڭداعى قارۋلى كۇشتەرىن شىعارىپ كەتۋى كەرەك. قۇراما شتاتتار دونباسستاعى قارۋلى قاقتىعىستى كەلىسسوزبەن شەشۋگە قاتىسۋعا دايىن. اشىعىن ايتار بولساق، ەگەر رەسەي تىرەسۋدى جالعاستىرا بەرەتىن بولسا، بۇنىڭ سوڭى اۋىر اپاتقا الىپ كەلەدى»، – دەدى بلينكەن كەزدەسۋدە.

رەسەي باس ديپلوماتى سەرگەي لاۆروۆتىڭ دا پىكىرى قاتاڭ بولدى، ونىڭ ايتۋىنشا ناتو رەسەيدىڭ ۇلتتىق مۇددەسىن ەسكەرۋسىز قايىرىپ قويىپ، ۋكرايناعا اسكەري كومەك كورسەتۋدى جالعاستىرىپ وتىر. «اسكەري تىرەسۋدىڭ ەڭ ناشار ستسەناريى پايدا بولۋدا. ۋكراينا ماسەلەسى تولاسسىز شيەلەنىسكە كەتىپ جاتىر، اليانستىڭ اسكەري كەشەندەرى رەسەيگە جاقىنداي ءتۇستى. رۋمىنيا مەن پولشادا زىمىرانعا قارىسى جۇيەلەر ورناتىلا باستادى. امەريكالىق ورتا قاشىقتىققا اتىلاتىن زىمىراندارى ەۋروپادا پايدا بولۋ الدىندا تۇرادى. رەسەي ەشقانداي كونفليكتتى قالامايدى»، – دەدى سەرگەي لاۆروۆ.

اقش، رەسەي، ۋكراينا جانە ەقىۇ سىرتقى ىستەر مينيسترلەرى اراسىنداعى كەزدەسۋدە قازىرگى جاعدايعا بايلانىستى تالقى قايىم ايتىسقا ۇلاسقانىن ۋكراينا باسىلىمدارى جازىپ جاتىر. تاراپتاردىڭ كەزدەسۋىنەن كەيىن ساراپشىلار رەسەي مەن باتىس اراسىنداعى اسكەري تىرەس ءتىپتى دە ءورشىپ، قاۋىپتى قارسىلاسۋعا كەتىپ قالۋى دا مۇمكىن دەگەن الاڭداۋشىلىقتار بىلدىرۋدە.

The Qazaq Times