Foto: adyrna.kz

28 qaraşada Almatıda Abay eskertkişiniñ mañına Oyan, Qazaqstan jastar qozğalısınıñ ökilderi jinalıp, birneşe kün bwrın qaytıs bolğan dissident, aqın Aron Atabekti eske aldı. Bwl turalı Ortalıq Aziya jañalıqtar qızmeti jazdı.

Belsendiler Aron Atabektiñ öleñderin oqıp, "Şañıraq isin" qayta qaraudı talap etti. Mitingige Aron Atabektiñ qızı Aydana Aydarhan, azamattıq belsendi, "Nwr Otan" partiyasın sınağanı üşin qudalanğan Älnwr Iliyaşev te keldi. Aydana Aydarhan äkesi damuına üles qosqan demokratiya üşin küresti jalğastıruğa şaqırdı.

Äkimdik ökilderi kelip, şaranıñ zañsız ekenin eskertken. Şarağa jastardan bölek, eresek buın ökilderi de kelgen.

"Biz, Oyan, Qazaqstan müşeleri aqınnıñ ölimine tolığımen bilik kinäli dep sanaymız. Olar Aronğa zañsız ükim şığarıp, türmege otırğızdı. Atabektiñ densaulığınıñ naşarlap, köz jwmğanına jauaptı. Aron Atabek ömiriniñ soñına deyin öz principterine adal bolıp qaldı. Raqımşılıqqa kelispey, birde-bir ret Nazarbaevtan keşirim swrağan joq. Biz üşin ol mwqalmas qazaq samurayı bolıp qala beredi" delingen bwğan deyin taratılğan qozğalıs mälimdemesinde.

Aqparatqa qarağanda, akciya soñına qaray belsendiler Abay eskertkişiniñ aldına Atabektiñ sureti men gül şoqtarın qoyıp, bir minut ünsiz twrdı.

68 jastağı dissident, aqın Aron Atabek 24 qaraşada Almatı qalasındağı auruhanada köz jwmğan. 26 qaraşada onıñ denesi jer qoynına tapsırıldı.

Dissident "Şañıraq oqiğası" boyınşa sottalıp, 15 jıl türmede otırğan. Ol 1 qazanda densaulığına baylanıstı qamaudan bosatılğan. Atabek özine tağılğan ayıppen kelispey, jıldar boyı tolıq aqtaudı talap etken. Ol türmede şıqqannan keyin bir top belsendi men sayasatker Aron Atabekti qorğau komitetin qwrıp, halıqaralıq sotqa şağımdanıp, Aron Atabektiñ isin qayta qarauğa qol jetkizuge küş salatının aytqan. Halıqaralıq qwqıq qorğau wyımdarı men jergilikti belsendiler onıñ ölimine bilikti kinälap,tüsinikteme berudi talap etti. Halıqaralıq därejede tergeu jürgizu qajettigin de alğa tarttı.

"The Qazaq Times"