AQŞ qorğanıs ministri Ostin Uaşingtonda Singapur qorğanıs ministri Huañ Yoñhuñdı qabıldap, qorğanıs qatınasın keñeytip, Ündi-Tınıq mwhitı aymağındağı äskeri ıntımaqtastıqtı küşeytu mäselelerin talqıladı.

Kezdesuden bwrın Pentagonda mälimdeme jasağan Ostin Ündi-Tınıq mwhitı aymağınıñ birqatar kürdeli problemalarğa tap bolğanın, sondıqtan da osı aymaqtağı serikterimen tığız baylanıstı saqtauğa tırısatının aytqan bolatın.

Pentagon basşısı aymaqtıñ problemaları qatarında Qıtaydıñ artıp kele jatqan äskeri ıqpalı turalı söz etken joq. Degenmen, jıl basında qızmetke kirisken kezinde Ostin Qıtaydıñ «kezeñ-kezeñ sın qaterlerine» jauap beru Wlttıq qorğanıs strategiyasınıñ bastı maqsatı ekenin aşıq ayqtan edi. Şildede ol Qıtaydıñ Oñtüstik Qıtay teñizindegi jäne basqa da salalardağı sın-qaterlerine qarsı aymaqtıq eldermen qarım-qatınastı nığaytu maqsatında Singapur, V'etnam jäne Filippinge resmi saparmen barğan.

Bwl jolı Qwrama Ştattarğa saparlay barğan Huañ şildedegi kelissözder negizinde eki eldiñ aymaqtağı äskeri ornalasuın talqılauğa dayın ekenin bildirgen.

Kezdesude belgili bolğanday, AQŞ pen Singapur qorğanıs küşteri arasında baylanıstı arttıradı. AQŞ äue küşteri men Singapurdıñ teñiz küşteri arasında ortaq äreket etu mümkindikterin jetildiredi; sonday-aq, taraptar Ündi-Tınıq mwhitı aymağına ortaq äsker ornalastıru boyınşa da is alıp baradı.

Singapur köp uaqıttan beri AQŞ äue jäne teñiz äskeri küşteriniñ aymaqtağı äreketterine joğarı deñgeyde qoldau körsetip keledi. Sonıñ özinde Qıtaymen artıp kele jatqan ekonomikalıq baylanıstarğa say Singapur AQŞ pen Qıtay arasındağı balanstı saqtauğa da küş salıp kelgen edi. Biraq, bolaşaqtağı aymaqtıñ geosayasi damu bağıtınan alıp qarağanda Sigapur bwl balanstı wzaq uaqıt wstap twra almaytınday.

  The Qazaq Times