پەنتاگون باسشىسى سيگاپۋرلىق ارىپتەسىن كۇتىپ الدى. فوتو: DOD

اقش قورعانىس ءمينيسترى وستين ۋاشينگتوندا سينگاپۋر قورعانىس ءمينيسترى حۋاڭ يوڭحۋڭدى قابىلداپ، قورعانىس قاتىناسىن كەڭەيتىپ، ءۇندى-تىنىق مۇحيتى ايماعىنداعى اسكەري ىنتىماقتاستىقتى كۇشەيتۋ ماسەلەلەرىن تالقىلادى.

كەزدەسۋدەن بۇرىن پەنتاگوندا مالىمدەمە جاساعان وستين ءۇندى-تىنىق مۇحيتى ايماعىنىڭ بىرقاتار كۇردەلى پروبلەمالارعا تاپ بولعانىن، سوندىقتان دا وسى ايماقتاعى سەرىكتەرىمەن تىعىز بايلانىستى ساقتاۋعا تىرىساتىنىن ايتقان بولاتىن.

پەنتاگون باسشىسى ايماقتىڭ پروبلەمالارى قاتارىندا قىتايدىڭ ارتىپ كەلە جاتقان اسكەري ىقپالى تۋرالى ءسوز ەتكەن جوق. دەگەنمەن، جىل باسىندا قىزمەتكە كىرىسكەن كەزىندە وستين قىتايدىڭ «كەزەڭ-كەزەڭ سىن قاتەرلەرىنە» جاۋاپ بەرۋ ۇلتتىق قورعانىس ستراتەگياسىنىڭ باستى ماقساتى ەكەنىن اشىق ايقتان ەدى. شىلدەدە ول قىتايدىڭ وڭتۇستىك قىتاي تەڭىزىندەگى جانە باسقا دا سالالارداعى سىن-قاتەرلەرىنە قارسى ايماقتىق ەلدەرمەن قارىم-قاتىناستى نىعايتۋ ماقساتىندا سينگاپۋر، ۆەتنام جانە فيليپپينگە رەسمي ساپارمەن بارعان.

بۇل جولى قۇراما شتاتتارعا ساپارلاي بارعان حۋاڭ شىلدەدەگى كەلىسسوزدەر نەگىزىندە ەكى ەلدىڭ ايماقتاعى اسكەري ورنالاسۋىن تالقىلاۋعا دايىن ەكەنىن بىلدىرگەن.

كەزدەسۋدە بەلگىلى بولعانداي، اقش پەن سينگاپۋر قورعانىس كۇشتەرى اراسىندا بايلانىستى ارتتىرادى. اقش اۋە كۇشتەرى مەن سينگاپۋردىڭ تەڭىز كۇشتەرى اراسىندا ورتاق ارەكەت ەتۋ مۇمكىندىكتەرىن جەتىلدىرەدى; سونداي-اق، تاراپتار ءۇندى-تىنىق مۇحيتى ايماعىنا ورتاق اسكەر ورنالاستىرۋ بويىنشا دا ءىس الىپ بارادى.

سينگاپۋر كوپ ۋاقىتتان بەرى اقش اۋە جانە تەڭىز اسكەري كۇشتەرىنىڭ ايماقتاعى ارەكەتتەرىنە جوعارى دەڭگەيدە قولداۋ كورسەتىپ كەلەدى. سونىڭ وزىندە قىتايمەن ارتىپ كەلە جاتقان ەكونوميكالىق بايلانىستارعا ساي سينگاپۋر اقش پەن قىتاي اراسىنداعى بالانستى ساقتاۋعا دا كۇش سالىپ كەلگەن ەدى. بىراق، بولاشاقتاعى ايماقتىڭ گەوساياسي دامۋ باعىتىنان الىپ قاراعاندا سيگاپۋر بۇل بالانستى ۇزاق ۋاقىت ۇستاپ تۇرا المايتىنداي.

  The Qazaq Times