اۋىل شارۋاشىلىعى ءمينيتسرى ەربول قاراشوكەەۆ الەۋمەتتىك ماڭىزى بار ازىق-تۇلىكتەر قورى سارقىلماسا دا باعانىڭ وسەتىنىن جاسىرمادى.

كوكتەمگە قاراي قازاقستاننىڭ ىشكى نارىعىندا ەت باعاسى ءوسۋى ىقتيمال. بۇل قازىر جەم-ءشوپ باعاسىنىڭ ارتۋىنا بايلانىستى. «دەسە دە ەت باعاسى كوپ وسپەيدى دەگەن بولجامىمىز بار»، – دەپ مالىمدەدى اۋىل شارۋاشىلىعى ءمينيسترى قاراشوكەەۆ ورتكوم الاڭىندا وتكەن بريفينگتە.

«قازاقستاننىڭ اۋىل شارۋاشىلىعى كەشەنى ەلدى ەتپەن – 100%، سيىر ەتى – 97%، قوي ەتى – 100%، جىلقى ەتىمەن – 97,5% قامتاماسىز ەتتى. ياعني، ىشكى سۇرانىستى ءوزىمىزدىڭ ونىممەن تولىق قامتىپ وتىرمىز. سوندىقتان بىزدە يمپورتپەن شەتەلدەن اكەلىنەتىن ەت كولەمى كوپ ەمەس. ال باعاسىنا توقتالاتىن بولساق، بيىل جەم-ءشوپ باعاسىنىڭ وسكەنىن بىلەسىزدەر. سول سەبەپتى ەت باعاسىنىڭ ءوسۋى ىقتيمال. ويتكەنى، ەت ءوندىرىپ جاتقان قوجالىقتار مەن شارۋا قوجالىقتارى شىعىندارىنىڭ بارلىعىن وتەۋى كەرەك. بىراق اسا جوعارى ءوسىم بولمايتىن شىعار»، – دەدى ەربول قاراشوكەەۆ.

ءبىر جىلدىڭ ىشىندە قويدىڭ ەتى قاتتى قىمباتتاعان. ونىڭ باعاسى بىردەن 14,9% كوتەرىلدى. ودان كەيىن جىلقى ەتى – 9,4%، سيىر ەتى — 7,8%، شوشقا ەتى — 7,4%، ال قۇس ەتى 3,2% قىمباتتادى.

سونىمەن قاتار، مينيستر الەۋمەتتىك نان باعاسىنىڭ كۇرت وسۋىنە جول بەرمەيتىنىن مالىمدەدى. ايتۋىنشا، بۇل ءۇشىن قاجەتتى بارلىق قۇرال مەن وتكەن جىلدان قالعان 1 ملن تونناعا جۋىق قور بار. جىل سايىن بۇل قور نان باعاسىن تۇراقتاندىرۋ ءۇشىن عانا ەمەس، مال شارۋاشىلىعى كەشەنىنە قولداۋ ءبىلدىرۋ ءۇشىن دە قولدانىلادى.

«بيىل ازىق-تۇلىك كەلىسىمشارت كورپوراتسياسى فورۆاردتىق ساتىپ الۋ شارتتارى بويىنشا 680 مىڭ توننا بيداي ساتىپ الامىز دەپ جوسپارلاپ وتىرمىز. سول كولەمنىڭ 60%-عا جۋىعىن ساتىپ الىپ، قويمالارىمىزعا اكەلىپ الدىق. 1-2 اي ىشىندە قاجەتتى كولەمدى تولىقتاي ساتىپ الىپ، جەمدى دە جيناپ شىعامىز. مەملەكەتتىك قوردا بىلتىردان قالعان 400 مىڭ تونناداي جەم بار. سونى قوسقاندا بىزدەگى قور ۇنمەن جانە ۇننان جاسالاتىن باسقا دا تاۋارلارمەن قامتاماسىز ەتۋگە تولىقتاي جەتكىلىكتى. ال باعاسىنا كەلەتىن بولساق، قازاقستان بويىنشا الەۋمەتتىك ماڭىزى بار تاۋارلار ءتىزىمى بار. سول تاۋارلار تىزىمىنەن ناندى الساق، ءبىرىنشى سورتتاعى ۇننان جاسالاتىن، سالماعى 552 گرامم بولاتىن بولكەنىڭ باعاسى كوتەرىلىپ كەتپەۋى ءۇشىن تالاي جۇمىس جاساپ جاتىرمىز. تۇراقتاندىرۋ قورى ءوز كەزەگىندە قاجەت كولەمدە ۇندى جيناپ، ساتىپ الىپ جاتىر. سونداي-اق، كەلىسىمشارت كورپوراتسياسىمەن مەملەكەتتىك قورعا جينالاتىن بيدايدى ارزانداتۋ مۇمكىنشىلىگىن قاراستىرىپ جاتىرمىز. ول ءۇشىن زاڭناما نەگىزدەمەسىنە وزگەرىس ەنگىزەمىز»، – دەپ ءتۇسىندىردى ەربول قاراشوكەەۆ.

سونداي-اق، مينيستر وسى جينالعان قوردان ءىرى كومپانيالار مەن نان پىسىرەتىن كاسىپورىندارعا ۇن جىبەرىلەتىنىن ايتتى. وسىلايشا الەۋمەتتىك نان باعاسى تۇراقتى بولادى.

The Qazaq Times