AQŞ pen Qıtaydıñ ara-qatınası şielenisip, Tayuan (Tayvan') bwğazı qaqtığıstıñ ıqtimal aymağına aynalıp twrğan kezde Resey prezidenti kütpegen pikir bildirdi. Vladimir Putin bwğazda qaqtığıs bolu mümkindigin joqqa şığarğan jäne «Beyjiñ üşin qaru qoldanudıñ qajeti joq, onsız da maqsatıya jete aladı» degen oyın aytqan. RF prezidentiniñ pikiri birqatar eldiñ aqparat qwraldarında qızu talqı taqırıbına aynalıp şığa keldi.   

Qazan ayınıñ alğaşqı küninen tartıp Qıtay Halıq-azattıq armiyasınıñ äue küşterine tiesili joyğış, şabuıldauşı jäne bombalauşı wşaqtar Tayuannıñ äue qorğanıs keñistigine top-tobımen kirip, tarihtağı eñ auqımdı äskeri qısım jasadı. 1 qazan men 4 qazan arasında ğana Tayuan keñistigine kirgen Qıtay wşaqtarınıñ sanı 150-den asqan. Bwğazdağı şielenis küşeyip, aymaqtağı elder qaqtığıs qaupinen alañdap otırğan kezde Putinniñ bwnday pikir aytuı tañ qaldırğanı anıq.

Putin atalğan pikirin särsenbide Mäskeudegi «Resey energetikalıq aptalığı» konferenciyası ayasında CNBC arnasına bergen swqpatta ortağa salğan bolatın.

Ötken aptada Tayuannıñ qorğanıs ministri Çyu Gojıñ aqparat qwraldarına jasağan mälimdemesinde, Qıtay äue küşteriniñ qısımına baylanıstı Tayuan 40 jıldan bergi eñ auır jağdaydı bastan keşirip jatqanın aytqan bolatın. Ol sonday-aq, Qıtay Halıq-azattıq armiyası 2025 jılğa barğanda Tayuanğa şabuıl jasauğa tolıq mümkindik aladı dep körsetken.

Keşe, Tayuannıñ Wlttıq qorğanıs ministrligi Beyjiñge qarata eskertu jasad, onda Qıtay wşaqtarı endi Tayuan aralına tım jaqın keletin bolsa bwrınğıdan da küşti qorğanıs şaraların qabıldaytının atağan.

Qıtay basşısı Şi Jinpiñ ötken senbide 1911 jılğı revolyuciyanıñ 110 jıldığına arnalğan jinalısta «Wlttıq territoriyanı biriktiru» turalı öziniñ wstanımın körsetkendey boldı. Onda ol: «Otandı tolıqtay biriutirudiñ tarihi mindetine qol jetkizu kerek jäne bwl mindetti türde jüzege asadı», – dedi. Ol «Ülken Qıtay» territoriyasın biriktiruge bergen uäde qatarında qabıldanuda. Bwl Beyjiñ biliginiñ Tayuanğa qarata wstanımın tipti de anıqtay tüsti.

Al, Putin bolsa öz sözinde Şi Jinpiñniñ sözin «Beybit biriktiru» wstanımı retinde bağalağan, äri Qıtay ükimetiniñ «basşılıq filosofiyası» äskeri qaqtığıstardı boldırmaudı negiz etetinin köbirek alğa tartqan. «Meniñ oyımşa Qıtayğa küş qoldanudıñ qajeti joq. Qıtay - quattı ekonomika, al satıp alu qabiletiniñ pariteti boyınşa ol qazir AQŞ -tı basıp ozıp, älemdegi eñ iri ekonomikalıq derjavağa aynaldı», – degen Putin sözinde.

Soğan qosa Putin swbatında Resey-Qıtay qatınası jan-jaqtı salada qarqındı damıp kele jatqanın aytqan. Soñğı jıldardağı AQŞ bastağan Batıs elderiniñ Qıtay jäne Reseymen qarım-qatınasınıñ naşarlauı Mäskeu men Beyjiñniñ strategiyalıq seriktestik qatınastı damıtuına jol aştı. Bwl arada da Putin Beyjiñniñ tamırın tartıp, AQŞ-Qıtay qatınasındağı sezimtal jäne qaqtığıstıñ ıqtimal nüktesine aynalğan Tayuan taqırıbına kütpegen pikir berip otır deuge boladı.

The Qazaq Times