Almatı oblısı Rayımbek audanı Sarıjaz auılındağı Labası tauınıñ eñ biik şıñına memleket jäne qoğam qayratkeri, 15 jıl bwrın qastandıqpen öltirilgen sayasatker Altınbek Särsenbaywlınıñ esimi berildi. Bwl bastamanı sol auıldıñ twrğındarı kötergen. 

Keşe, 14 qırküyek Särsenbaywlınıñ tuğan künine oray, sarıjazdıqtar taudıñ eñ biik nüktesine "Altınbek şıñı" degen belgi ornattı. Auıl twrğındarı, mektep wstazdarı men oquşıları biiktigi 3488 metr bolatın şıñğa köterilip, estelik suretke tüsti. Şarağa marqwmnıñ tuğan bauırı, oppoziciyadağı sayasatker Rısbek Särsenbaywlı da qatıstı. Ol bastama kötergen jerlesterine rizaşılığın bildirip, bauırı jaylı estelik ayttı.

Labası tauınıñ eñ biik şıñana sarıjazdıqtar ornatqan belgi.

Oppoziciyalıq sayasatker Altınbek Särsenbaywlı 2006 jılı aqpanda Almatıda qastandıqpen öltirildi.  Sayasatkerdiñ jäne onıñ eki kömekşisi - Vasiliy Juravlev pen Bauırjan Baybosınovtıñ süyegi Almatı irgesindegi tau bökterinen tabılğan edi.

Sol kezde osı iske baylanıstı parlament senatı apparatınıñ bwrınğı basşısı Erjan Ötembaev jäne Wlttıq qauipsizdik komitetiniñ birneşe qızmetkeri wzaq jılğa sottaldı. Bwğan qosa, tapsırıstı orındauşı retinde policiyanıñ bwrınğı qızmetkeri Rustam Ibragimov ömir boyına türme jazasına kesildi. Al 2014 jılı jeltoqsanda is qayta qaralıp, sot Qazaqstannıñ sol kezdegi prezidenti Nwrswltan Nazarbaevtıñ bwrınğı küyeu balası Rahat Äliev pen WQK bwrınğı törağası Älnwr Mwsaevtı tapsırıs beruşi retinde tanıdı. Biraq ol kezde Äliev te, Mwsaev ta şetelge qaşıp ketken edi.

Äliev öler alında bwl iske qatıstılardı "Qazaqstannıñ joğarğı basşılığı arasınan izdeu kerek" degen. Al Mwsaev 2021 jılı Azattıq radiosına bergen swhbatında Särsenbaywlın öltiruge "Nazarbaev astarlap tapsırma beregenin" aytqan.

The Qazaq Times