ءبىر توپ ادامنىڭ "التىنبەك شىڭىنا" شىققان ءساتى.

الماتى وبلىسى رايىمبەك اۋدانى سارىجاز اۋىلىنداعى لاباسى تاۋىنىڭ ەڭ بيىك شىڭىنا مەملەكەت جانە قوعام قايراتكەرى، 15 جىل بۇرىن قاستاندىقپەن ولتىرىلگەن ساياساتكەر التىنبەك سارسەنبايۇلىنىڭ ەسىمى بەرىلدى. بۇل باستامانى سول اۋىلدىڭ تۇرعىندارى كوتەرگەن. 

كەشە، 14 قىركۇيەك سارسەنبايۇلىنىڭ تۋعان كۇنىنە وراي، سارىجازدىقتار تاۋدىڭ ەڭ بيىك نۇكتەسىنە "التىنبەك شىڭى" دەگەن بەلگى ورناتتى. اۋىل تۇرعىندارى، مەكتەپ ۇستازدارى مەن وقۋشىلارى بيىكتىگى 3488 مەتر بولاتىن شىڭعا كوتەرىلىپ، ەستەلىك سۋرەتكە ءتۇستى. شاراعا مارقۇمنىڭ تۋعان باۋىرى، وپپوزيتسياداعى ساياساتكەر رىسبەك سارسەنبايۇلى دا قاتىستى. ول باستاما كوتەرگەن جەرلەستەرىنە ريزاشىلىعىن ءبىلدىرىپ، باۋىرى جايلى ەستەلىك ايتتى.

لاباسى تاۋىنىڭ ەڭ بيىك شىڭانا سارىجازدىقتار ورناتقان بەلگى.

وپپوزيتسيالىق ساياساتكەر التىنبەك سارسەنبايۇلى 2006 جىلى اقپاندا الماتىدا قاستاندىقپەن ءولتىرىلدى.  ساياساتكەردىڭ جانە ونىڭ ەكى كومەكشىسى - ۆاسيلي جۋراۆلەۆ پەن باۋىرجان بايبوسىنوۆتىڭ سۇيەگى الماتى ىرگەسىندەگى تاۋ بوكتەرىنەن تابىلعان ەدى.

سول كەزدە وسى ىسكە بايلانىستى پارلامەنت سەناتى اپپاراتىنىڭ بۇرىنعى باسشىسى ەرجان وتەمباەۆ جانە ۇلتتىق قاۋىپسىزدىك كوميتەتىنىڭ بىرنەشە قىزمەتكەرى ۇزاق جىلعا سوتتالدى. بۇعان قوسا، تاپسىرىستى ورىنداۋشى رەتىندە پوليتسيانىڭ بۇرىنعى قىزمەتكەرى رۋستام يبراگيموۆ ءومىر بويىنا تۇرمە جازاسىنا كەسىلدى. ال 2014 جىلى جەلتوقساندا ءىس قايتا قارالىپ، سوت قازاقستاننىڭ سول كەزدەگى پرەزيدەنتى نۇرسۇلتان نازارباەۆتىڭ بۇرىنعى كۇيەۋ بالاسى راحات اليەۆ پەن ۇقك بۇرىنعى توراعاسى ءالنۇر مۇساەۆتى تاپسىرىس بەرۋشى رەتىندە تانىدى. بىراق ول كەزدە اليەۆ تە، مۇساەۆ تا شەتەلگە قاشىپ كەتكەن ەدى.

اليەۆ ولەر الىندا بۇل ىسكە قاتىستىلاردى "قازاقستاننىڭ جوعارعى باسشىلىعى اراسىنان ىزدەۋ كەرەك" دەگەن. ال مۇساەۆ 2021 جىلى ازاتتىق راديوسىنا بەرگەن سۇحباتىندا سارسەنبايۇلىن ولتىرۋگە "نازارباەۆ استارلاپ تاپسىرما بەرەگەنىن" ايتقان.

The Qazaq Times