Qazaqstannıñ eki qalasında bir top äyel balalarğa vakcina saldırmaudı talap etti

Bügin, 7 qırküyekte Şımkent jäne Aqtöbe qalasında vakcina saluğa qarsı azamattardıñ narazılıq şarası ötti. Bwl turalı Azattıq radiosı habarladı. 

Basılım mälimetinşe, Şımkent qalası äkimdiginiñ aldına 20-dan asa äyel jinalıp, "äkim şıq" dep ayqaylap, qala basşısı Mwrat Äytenovtiñ şığuın talap etti. Biraq äkimdikten eşkim şıqpadı. Al narazılar balalardı oflayn oqıtuğa jäne olarğa koronavirusqa qarsı vakcina saluğa qarsı ekendikterin jetkizdi.

Azattıqtıñ jazuınşa, seysenbi küni osığan wqsas şara Aqtöbe qalasınıñ ortalığında da ötken.

Aqtöbe oblısı äkimdiginiñ aldına on şaqtı adam jinalıp, balalardı vakcinalauğa qarsılıq bildirdi.

"Vakcina al" dediñder – aldıq. "Balalarğa tiispeymiz" dep uäde bergensiñder. Al endi istep otırğandarıñ mınau. Elge 4 mln vakcina satıp aldı. Endi olardı balalarğa mäjbürlep saladı" dedi balalarğa ekpe eguge qarsılıq bildirgen ata-analardıñ biri.

Oqiğa ornında policiya köp boldı. Äkimdiktiñ artına arnayı jasaq mingen avtobustar äkelindi. Narazılarğa Aqtöbe oblıstıq densaulıq saqtau basqarması basşısınıñ orınbasarı Aygül Küştaeva men oblıstıq bilim basqarması basşısınıñ orınbasarı Nwrgül Bertileuova şıqtı.

"Osı jıldıñ törtinşi toqsanında [balalarğa vakcina salu] josparlanıp otır. Biraq bwl äzirge, jospar ğana. Tipti vakcina salğan künniñ özinde ata-ananıñ rwqsatımen salınadı. Alañdauğa negiz joq. Bügingi tañda bizge balalarğa koronavirusqa qarsı vakcina salu turalı eşqanday tapsırma berilgen joq. Balalar kündelikti sabaqqa barıp jür" dedi Aygül Küştaeva.

Jwrt olardıñ jauabına qanağattanbadı. Bertileuovanıñ aytuınşa, jaña oqu jılı qarsañında sozılmalı auruı bar 50 balanıñ ata-anası balaların mektepke jibermey, üyden oqıtıp otır.

Bwğan deyin Qazaqstanda qazan ayında 12 jastan bastap balalarğa koronavirusqa qarsı Pfizer vakcinası salınuı mümkin ekeni habarlanğan edi. Ministrlik vakcina ata-anası nemese qamqorşısınıñ rwqsatımen ğana salınadı dep mälimdegen.

The Qazaq Times