قازاقستاننىڭ ەكى قالاسىندا ءبىر توپ ايەل بالالارعا ۆاكتسينا سالدىرماۋدى تالاپ ەتتى

بۇگىن، 7 قىركۇيەكتە شىمكەنت جانە اقتوبە قالاسىندا ۆاكتسينا سالۋعا قارسى ازاماتتاردىڭ نارازىلىق شاراسى ءوتتى. بۇل تۋرالى ازاتتىق راديوسى حابارلادى. 

باسىلىم مالىمەتىنشە، شىمكەنت قالاسى اكىمدىگىنىڭ الدىنا 20-دان اسا ايەل جينالىپ، "اكىم شىق" دەپ ايقايلاپ، قالا باسشىسى مۇرات ايتەنوۆتىڭ شىعۋىن تالاپ ەتتى. بىراق اكىمدىكتەن ەشكىم شىقپادى. ال نارازىلار بالالاردى وفلاين وقىتۋعا جانە ولارعا كوروناۆيرۋسقا قارسى ۆاكتسينا سالۋعا قارسى ەكەندىكتەرىن جەتكىزدى.

ازاتتىقتىڭ جازۋىنشا، سەيسەنبى كۇنى وسىعان ۇقساس شارا اقتوبە قالاسىنىڭ ورتالىعىندا دا وتكەن.

اقتوبە وبلىسى اكىمدىگىنىڭ الدىنا ون شاقتى ادام جينالىپ، بالالاردى ۆاكتسينالاۋعا قارسىلىق ءبىلدىردى.

"ۆاكتسينا ال" دەدىڭدەر – الدىق. "بالالارعا تيىسپەيمىز" دەپ ۋادە بەرگەنسىڭدەر. ال ەندى ىستەپ وتىرعاندارىڭ مىناۋ. ەلگە 4 ملن ۆاكتسينا ساتىپ الدى. ەندى ولاردى بالالارعا ماجبۇرلەپ سالادى" دەدى بالالارعا ەكپە ەگۋگە قارسىلىق بىلدىرگەن اتا-انالاردىڭ ءبىرى.

وقيعا ورنىندا پوليتسيا كوپ بولدى. اكىمدىكتىڭ ارتىنا ارنايى جاساق مىنگەن اۆتوبۋستار اكەلىندى. نارازىلارعا اقتوبە وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى ايگۇل كۇشتاەۆا مەن وبلىستىق ءبىلىم باسقارماسى باسشىسىنىڭ ورىنباسارى نۇرگۇل بەرتىلەۋوۆا شىقتى.

"وسى جىلدىڭ ءتورتىنشى توقسانىندا [بالالارعا ۆاكتسينا سالۋ] جوسپارلانىپ وتىر. بىراق بۇل ازىرگە، جوسپار عانا. ءتىپتى ۆاكتسينا سالعان كۇننىڭ وزىندە اتا-انانىڭ رۇقساتىمەن سالىنادى. الاڭداۋعا نەگىز جوق. بۇگىنگى تاڭدا بىزگە بالالارعا كوروناۆيرۋسقا قارسى ۆاكتسينا سالۋ تۋرالى ەشقانداي تاپسىرما بەرىلگەن جوق. بالالار كۇندەلىكتى ساباققا بارىپ ءجۇر" دەدى ايگۇل كۇشتاەۆا.

جۇرت ولاردىڭ جاۋابىنا قاناعاتتانبادى. بەرتىلەۋوۆانىڭ ايتۋىنشا، جاڭا وقۋ جىلى قارساڭىندا سوزىلمالى اۋرۋى بار 50 بالانىڭ اتا-اناسى بالالارىن مەكتەپكە جىبەرمەي، ۇيدەن وقىتىپ وتىر.

بۇعان دەيىن قازاقستاندا قازان ايىندا 12 جاستان باستاپ بالالارعا كوروناۆيرۋسقا قارسى Pfizer ۆاكتسيناسى سالىنۋى مۇمكىن ەكەنى حابارلانعان ەدى. مينيسترلىك ۆاكتسينا اتا-اناسى نەمەسە قامقورشىسىنىڭ رۇقساتىمەن عانا سالىنادى دەپ مالىمدەگەن.

The Qazaq Times