Bayzaqtağı jarılıstıñ saldarınan iz-tüssiz joğalğan kişi serjant Bauırjan Däuitbaydıñ äkesi Talğat wlınan habar tosıp jürgenine birneşe täulik ötti. 30 tamız 2021 jıl. Jambıl oblısı, Qaynar auılınıñ twsı. Foto: QT / Kültegin Aspanwlı

İz-tüssiz joğalğan äskeri bölimniñ örtke qarsı küres jäne qwtqaru qızmeti basşısı, kişi serjant Bauırjan Däuitbaev pen TJD ört söndiruşisi, kişi serjant Ädilet Ädilbekovtiñ tuıstarı habar kütip otırğanına tört künnen astı.

Soñğı derek boyınşa, 14 marqwmnıñ denesi tabılğan. Tağı eki qızmetker izdestirilip jatır.

Beysenbiden beri Qaynar auılınıñ kireberisinde kün astında tuğanınıñ habarın tosumen janarı sualğan Talğat Däuitbaywlı jalğız wlı Bauırjanın qimaydı. Auır mwñ jwtınğan äke wlınıñ kelinşegi besinşi perzentine jükti ekenin aytadı. 33 jastağı Bauırjan Däuitbaev jarılıs bolar küni jwmısta bolğan.

Tuıstarınıñ biri «Bärine basşıları kinäli, qoymada qauipti qaru barın bile twra jigitterdi otqa aydap saldı. Soldattardı äskeri bölimnen şığarıp jibergen dağı, al kelisimşart negizinde jwmıs isteytin ört söndiruşilerdi alıp qalğan. Olarğa şaması kelmeytinin bile twra qoymadağı alapat qızıl jalındı öşiruge tapsırma bergen. Basşıları bärin bildi emes pe? Onda öte qaterli oq-däriniñ saqtalğanın anıq bildi ğoy» dep aşındı.

Äli tabılmay jatqan ekinşi kişi serjant, 25 jastağı Ädilet Ädilbek Qanatwlınıñ tuıstarı resmi organdardan köñili qalğanın aytıp, pikir bildiruden bas tarttı. Eki jigittiñ jaqındarı äkeri prokuraturanıñ tüsinik beruin, aldına şığıp oqiğa barısı men tapsırma negizdemesin tüsindirudi talap etip otır.

Oqiğa ornında izdestiru jwmısın jürgizip jatqan Qorğanıs ministrliginiñ Bas inspekciya basqarmasınıñ basşısı, polkovnik Jwmabek Hasenov QT tilşisine bergen jauabında bügin tüske deyin 3 mäyittiñ jeke bası deregi naqtılanatının habarladı.

26 tamız keşkisin Jambıl oblısı Bayzaq audanındağı №28349 äskeri bölimi aumağında ornalasqan oq-däri saqtalatın qoymada jarılıs boldı. Soñğı resmi derekke say, tötenşe oqiğa saldarınan 14 adam qaza tauıp, 100 şaqtı adam zardap şekken.

Äskeri bölimniñ tübindegi Qaynar şağın auılında 17 üyde 90-ğa tarta twrğın mekendeydi. Audan köleminde 118 üy-nısan bülingen. Aymaqtağı atqaruşı bilik ökilderi eki ay merzimde barlıq materialdıq jäne infroqwrılım şığındarın qalıpqa keltiruge uäde berdi.

Oqiğa bolğan kezde habar-oşarsız ketken eki adamdı äli izdep jatır.  Olardı tabu üşin kinolog, iisşil itter, saperler, äskeriler, TJ mamandarı, jalpı jiını 40-tan asa tehnika, 180-dey adam jwmıldırılğan.

Ondağan adamnıñ ömirin jalmağan joyqın jarılısqa ne sebep bolğanı äli belgisiz. Qorğanıs ministri Nwrlan Ermekbaevtıñ topşılauınşa, jarılısqa qoymada qauipsizdik talaptarınıñ saqtalmauı, ya himiyalıq reakciyamen özdiginen tuuı nemese diversiya sebep boluı mümkin.

The Qazaq Times