جامبىلداعى جارىلىس: حابارى بەلگىسىز جىگىتتەردىڭ تۋىستارى حابار توسىپ وتىرعالى ءتورت كۇن بولدى

ءىز-ءتۇسسىز جوعالعان اسكەري ءبولىمنىڭ ورتكە قارسى كۇرەس جانە قۇتقارۋ قىزمەتى باسشىسى، كىشى سەرجانت باۋىرجان داۋىتباەۆ پەن تجد ءورت ءسوندىرۋشىسى، كىشى سەرجانت ادىلەت ادىلبەكوۆتىڭ تۋىستارى حابار كۇتىپ وتىرعانىنا ءتورت كۇننەن استى.

سوڭعى دەرەك بويىنشا، 14 مارقۇمنىڭ دەنەسى تابىلعان. تاعى ەكى قىزمەتكەر ىزدەستىرىلىپ جاتىر.

بەيسەنبىدەن بەرى قاينار اۋىلىنىڭ كىرەبەرىسىندە كۇن استىندا تۋعانىنىڭ حابارىن توسۋمەن جانارى سۋالعان تالعات ءداۋىتبايۇلى جالعىز ۇلى باۋىرجانىن قيمايدى. اۋىر مۇڭ جۇتىنعان اكە ۇلىنىڭ كەلىنشەگى بەسىنشى پەرزەنتىنە جۇكتى ەكەنىن ايتادى. 33 جاستاعى باۋىرجان داۋىتباەۆ جارىلىس بولار كۇنى جۇمىستا بولعان.

تۋىستارىنىڭ ءبىرى «بارىنە باسشىلارى كىنالى، قويمادا قاۋىپتى قارۋ بارىن بىلە تۇرا جىگىتتەردى وتقا ايداپ سالدى. سولداتتاردى اسكەري بولىمنەن شىعارىپ جىبەرگەن داعى، ال كەلىسىمشارت نەگىزىندە جۇمىس ىستەيتىن ءورت سوندىرۋشىلەردى الىپ قالعان. ولارعا شاماسى كەلمەيتىنىن بىلە تۇرا قويماداعى الاپات قىزىل جالىندى وشىرۋگە تاپسىرما بەرگەن. باسشىلارى ءبارىن ءبىلدى ەمەس پە؟ وندا وتە قاتەرلى وق-ءدارىنىڭ ساقتالعانىن انىق ءبىلدى عوي» دەپ اشىندى.

ءالى تابىلماي جاتقان ەكىنشى كىشى سەرجانت، 25 جاستاعى ادىلەت ادىلبەك قاناتۇلىنىڭ تۋىستارى رەسمي ورگانداردان كوڭىلى قالعانىن ايتىپ، پىكىر بىلدىرۋدەن باس تارتتى. ەكى جىگىتتىڭ جاقىندارى اكەري پروكۋراتۋرانىڭ تۇسىنىك بەرۋىن، الدىنا شىعىپ وقيعا بارىسى مەن تاپسىرما نەگىزدەمەسىن ءتۇسىندىرۋدى تالاپ ەتىپ وتىر.

وقيعا ورنىندا ىزدەستىرۋ جۇمىسىن جۇرگىزىپ جاتقان قورعانىس مينيسترلىگىنىڭ باس ينسپەكتسيا باسقارماسىنىڭ باسشىسى، پولكوۆنيك جۇمابەك حاسەنوۆ QT تىلشىسىنە بەرگەن جاۋابىندا بۇگىن تۇسكە دەيىن 3 ءمايىتتىڭ جەكە باسى دەرەگى ناقتىلاناتىنىن حابارلادى.

26 تامىز كەشكىسىن جامبىل وبلىسى بايزاق اۋدانىنداعى №28349 اسكەري ءبولىمى اۋماعىندا ورنالاسقان وق-ءدارى ساقتالاتىن قويمادا جارىلىس بولدى. سوڭعى رەسمي دەرەككە ساي، توتەنشە وقيعا سالدارىنان 14 ادام قازا تاۋىپ، 100 شاقتى ادام زارداپ شەككەن.

اسكەري ءبولىمنىڭ تۇبىندەگى قاينار شاعىن اۋىلىندا 17 ۇيدە 90-عا تارتا تۇرعىن مەكەندەيدى. اۋدان كولەمىندە 118 ءۇي-نىسان بۇلىنگەن. ايماقتاعى اتقارۋشى بيلىك وكىلدەرى ەكى اي مەرزىمدە بارلىق ماتەريالدىق جانە ينفروقۇرىلىم شىعىندارىن قالىپقا كەلتىرۋگە ۋادە بەردى.

وقيعا بولعان كەزدە حابار-وشارسىز كەتكەن ەكى ادامدى ءالى ىزدەپ جاتىر.  ولاردى تابۋ ءۇشىن كينولوگ، ءيىسشىل يتتەر، ساپەرلەر، اسكەريلەر، تج ماماندارى، جالپى جيىنى 40-تان اسا تەحنيكا، 180-دەي ادام جۇمىلدىرىلعان.

ونداعان ادامنىڭ ءومىرىن جالماعان جويقىن جارىلىسقا نە سەبەپ بولعانى ءالى بەلگىسىز. قورعانىس ءمينيسترى نۇرلان ەرمەكباەۆتىڭ توپشىلاۋىنشا، جارىلىسقا قويمادا قاۋىپسىزدىك تالاپتارىنىڭ ساقتالماۋى، يا حيميالىق رەاكتسيامەن وزدىگىنەن تۋى نەمەسە ديۆەرسيا سەبەپ بولۋى مۇمكىن.

The Qazaq Times