Jalaqını ösirudi talap etken Caspian food jwmısşıları videomälimdeme jasap twr. Foto: Videodan skrinşot

Keşe, 4 tamızda Mañğıstau oblısı Qarajanbas kenişinde Caspian food kompaniyasında isteytin jwmısşı äyelder jalaqı ösirudi talap etip, ereuilge şıqtı. Bwl aqparattı Lada.kz saytı habarladı. 

Äyelder prezident Qasım-Jomart Toqaevtan kömek swrap, videomälimdeme jasağan.

Sayttıñ jazuınşa, jwmısşılar jalaqını eki esege ösirudi jäne ekologiyağa baylanıstı özderin süt önimderimen qamtamasız etudi, jol men PTR-test şığının öteudi talap etip otır. Bwğan qosa, jağdayı naşar otbasılarğa nemese erli-zayıptılardıñ bireui ğana jwmıs isteytin otbasılarğa dotaciya töleudi swrap otır.

Lada.kz saytı jariyalağan videoda ondağan äyeldiñ jinalıp, bilik pen kompaniya basşılarına mälimdeme jasap jatqanı körinedi. Olar jalaqını 180-200 mıñğa deyin ösirudi swraydı.

"Caspian food kompaniyasınıñ jwmısşıları ekologiyalıq radiaciyanıñ densaulıqqa ziyanın eskerip, jalaqıdan bölek, koefficient qosıp töleuin talap etemiz. Sonımen birge ashanada aspen qamtamasız etu jağdayı qazirgi talapqa say emes. Jwmısşılar mwnayşılar ne jwtsa, sonı jwtıp jür. Sol sebepti ziyandılıq üşin qaymaq, yogurt, ayran, şwbat beriluin talap etemiz" deydi ündeudi oqığan jwmısşılardıñ biri.

Narazılarmen kezdesuge Caspian food kompaniyasınıñ kadr böliminiñ qızmetkerleri şığıp, olardıñ talaptarın tıñdap, ötinişterin qabıldağan. Mäseleni qarastıruğa uäde bergen.

Bwğan deyin Qarajanbas kenişinde "Qarajanbasmwnayğa" autsorsing kelisim-şartpen qızmet körsetetin Industrial service resources jäne "KMG-Security" küzetşileri jwmısşılardıñ äleumettik jağdayın jaqsartudı talap etip, ereuil ötkizgen. Talaptarı orındalğannan keyin ereuildi toqtatqan.

"The Qazaq Times"