جاڭاوزەندە جالاقىنى ءوسىرىپ، ەڭبەك جاعدايىن جاقسارتۋدى تالاپ ەتكەن ەرەۋىلدەر كوبەيدى. بەيسەنبىدە "مۇنايسپەتسسنابكومپاني" مەكەمەسىنىڭ جۇرگىزۋشىلەرى وسىنداي تالاپپەن ەرەۋىلگە شىقتى. بۇل تۋرالى ازاتتىق راديوسى حابارلادى. 

ازاتتىقتىڭ جازۋىنشا، جۇرگىزۋشىلەر 15 شىلدەدەن بەرى جۇمىسقا شىقپاعان.

ولار پرەزيدەنت قاسىم-جومارت توقاەۆ، پرەمەر-مينيستر اسقار مامين، "قازمۇنايگاز" ۇلتتىق كومپانياسى باسقارما توراعاسى اليك ايدارباەۆ، ماڭعىستاۋ وبلىسى اكىمى سەرىكباي تۇرىموۆ، جاڭاوزەن قالاسىنىڭ اكىمى ماقسات يباعاروۆ، "مۇنايسپەتسسناب كومپاني" جاۋاپكەرشىلىگى شەكتەۋلى سەرىكتەستىگى ديرەكتورى ەرلان سابيەۆكە جولداعان ارىزدارىن ۆيدەو ارقىلى بايانداپ، الەۋمەتتىك جەلىلەردە تاراتتى. وندا جۇمىسشىلار بيلىكتەن مەكەمەدەگى "زاڭسىز ارەكەتتەرگە" نازار اۋدارۋدى سۇراعان.

جۇمىسشىلاردىڭ ارىزىندا 11 تالاپ جازىلعان. اراسىندا تومەندەگىدەي پۋنكتەر دە بار: جالاقىنى 100 پايىزعا ءوسىرۋ، ەڭبەك كودەكسىنىڭ 22 بابىنىڭ 1-تارماعىنا سايكەس، وندىرىستىك مۇناي، گاز، كومىرسۋتەك گازى جانە وزگە دە دەنساۋلىققا زيان كەلتىرەتىن ايماقتا جۇمىس ىستەگەندىكتەن وتەماقى تولەۋ، ەڭبەككە ۋاقىتشا جارامسىزدىق بويىنشا جاردەماقى تولەۋ، 24 ساعاتتىق جۇمىس اۋىسىمىن توقتاتىپ، ەڭ كوپ دەگەندە 12 ساعاتتىق جۇمىس اۋىسىمىن ۇيىمداستىرۋ، تەحنيكالاردى جوندەۋ كەزىندە جۇمىسقا شىققان ۋاقىتتى ەسەپكە الۋ سياقتى تالاپتار بار.

"مۇنايسپەتسسنابكومپاني" جاۋاپكەرشىلىگى شەكتەۋلى سەرىكتەستىگى - "قازمۇنايگازدىڭ" ەنشىلەس كومپانيالارى "وزەنمۇنايگاز" اق مەن "وزەنمۇنايسەرۆيس" مەكەمەسىنە مەردىگەرلىك قىزمەت كورسەتەدى. ول اۋىر جۇك كولىكتەرىن، ارنايى تەحنيكالار مەن جەڭىل كولىكتەردى جالعا بەرۋمەن اينالىسادى. "مۇنايسپەتسسنابكومپانيا" جۇرگىزۋشىلەرى بيىل اقپان ايىندا دا تاريفتىك ستاۆكانى كوتەرۋدى تالاپ ەتىپ، ەرەۋىلگە شىققان ەدى.

قازىر جاڭاوزەندە "KMG-Security" كومپانياسى جۇمىسشىلارىنىڭ ەرەۋىلى جالعاسىپ جاتىر. ولار دا نەگىزىنەن جالاقى ءوسىرۋدى تالاپ ەتىپ وتىر.

"The Qazaq Times"