Körneki suret. Foto: aşıq derekköz

Biıl Qazaqstanda qañtar men mamır aylarınıñ aralığında ölim sanı bıltırğı osı kezeñge qarağanda 27%-ğa artqan.

Wlttıq statistika byurosı taratqan derekke säykes, 2021 jılğı qañtar-mamır aylarında Qazaqstanda bir jasqa deyingi 1423 säbi qaytıs bolğan. Bwl 2020 jılğı bes ayındağı esepten (aldıñğı jılı 1221 säbi şetinegen) 16,5%-ğa köbeygen.

Näreste öliminiñ koefficienti 1000 balağa şaqqanda 8,12 jağdayğa jetti.

Sonımen qosa, osı aralıqta (qañtar-mamır aylarında) elde 63,7 mıñ adam köz jwmğan. Bwl da bıltırğı bes aydağı körsetkişpen salıstırğanda 27,3%-ğa artıq (50 mıñ adam). Är mıñ adamnıñ 8,1-i ajal tırnağına ilikken.

Jağımdı jañalıq jöninde aytsaq, biıl qañtar-mamırda respublika halqınıñ tabiği ösimi ötken jıldıñ wqsas kezeñimen salıstırğanda 4,4% - ğa (111,5 mıñ) wlğaydı. AHAT organdarı wsınğan mälimet qorı boyınşa, biıl bes ayda 175,2 mıñ adam düniege kelgen. Bwl 2020 jılğı qañtar-mamırğa (156,8 mıñ adam) qarağanda 11,7% köp. Tuudıñ jalpı koefficienti 1000 adamğa 22,28 tuılğandardı qwradı. Mıñdıqqa şaqqanda tabiği ösimniñ jalpı koefficienti 14,18 jäne bala tuu körsetkişi 22,28 boldı.

Bıltır köz jwmğan 163 613 adamnıñ ölimi Qazaqstan üşin jaña jüzjıldıqtağı eñ joğarı körsetkişpen este qaldı.

Qazaqstanda pandemiya bastalğalı türli tehnikalıq jäne oqıs jağdaylardan qaytıs bolğandar edäuir kemigenimen, medicinalıq auru sebepterinen qaytıs bolğandar aytarlıqtay arttı. Degenmen resmi esepte naqtı koronavirustan köz jwmğandar sanı jalpı ölimnen birneşe esege az körsetilgen. Täuelsiz zertteu wyımdarı men sarapşılar kovidtiñ şınayı ölim körsetkişi ükimettik esepten äldeqayda köp ekenin jäne olardıñ basım böligi türli sozılmalı aurulardan qaytıs boldı dep räsimdelgenin aytadı.

"The Qazaq Times"