بيىل قازاقستاندا قاڭتار مەن مامىر ايلارىنىڭ ارالىعىندا ءولىم سانى بىلتىرعى وسى كەزەڭگە قاراعاندا 27%-عا ارتقان.

ۇلتتىق ستاتيستيكا بيۋروسى تاراتقان دەرەككە سايكەس، 2021 جىلعى قاڭتار-مامىر ايلارىندا قازاقستاندا ءبىر جاسقا دەيىنگى 1423 ءسابي قايتىس بولعان. بۇل 2020 جىلعى بەس ايىنداعى ەسەپتەن (الدىڭعى جىلى 1221 ءسابي شەتىنەگەن) 16,5%-عا كوبەيگەن.

نارەستە ءولىمىنىڭ كوەففيتسيەنتى 1000 بالاعا شاققاندا 8,12 جاعدايعا جەتتى.

سونىمەن قوسا، وسى ارالىقتا (قاڭتار-مامىر ايلارىندا) ەلدە 63,7 مىڭ ادام كوز جۇمعان. بۇل دا بىلتىرعى بەس ايداعى كورسەتكىشپەن سالىستىرعاندا 27,3%-عا ارتىق (50 مىڭ ادام). ءار مىڭ ادامنىڭ 8,1-ءى اجال تىرناعىنا ىلىككەن.

جاعىمدى جاڭالىق جونىندە ايتساق، بيىل قاڭتار-مامىردا رەسپۋبليكا حالقىنىڭ تابيعي ءوسىمى وتكەن جىلدىڭ ۇقساس كەزەڭىمەن سالىستىرعاندا 4,4% - عا (111,5 مىڭ) ۇلعايدى. احات ورگاندارى ۇسىنعان مالىمەت قورى بويىنشا، بيىل بەس ايدا 175,2 مىڭ ادام دۇنيەگە كەلگەن. بۇل 2020 جىلعى قاڭتار-مامىرعا (156,8 مىڭ ادام) قاراعاندا 11,7% كوپ. تۋدىڭ جالپى كوەففيتسيەنتى 1000 ادامعا 22,28 تۋىلعانداردى قۇرادى. مىڭدىققا شاققاندا تابيعي ءوسىمنىڭ جالپى كوەففيتسيەنتى 14,18 جانە بالا تۋ كورسەتكىشى 22,28 بولدى.

بىلتىر كوز جۇمعان 163 613 ادامنىڭ ءولىمى قازاقستان ءۇشىن جاڭا جۇزجىلدىقتاعى ەڭ جوعارى كورسەتكىشپەن ەستە قالدى.

قازاقستاندا پاندەميا باستالعالى ءتۇرلى تەحنيكالىق جانە وقىس جاعدايلاردان قايتىس بولعاندار ەداۋىر كەمىگەنىمەن، مەديتسينالىق اۋرۋ سەبەپتەرىنەن قايتىس بولعاندار ايتارلىقتاي ارتتى. دەگەنمەن رەسمي ەسەپتە ناقتى كوروناۆيرۋستان كوز جۇمعاندار سانى جالپى ولىمنەن بىرنەشە ەسەگە از كورسەتىلگەن. تاۋەلسىز زەرتتەۋ ۇيىمدارى مەن ساراپشىلار كوۆيدتىڭ شىنايى ءولىم كورسەتكىشى ۇكىمەتتىك ەسەپتەن الدەقايدا كوپ ەكەنىن جانە ولاردىڭ باسىم بولىگى ءتۇرلى سوزىلمالى اۋرۋلاردان قايتىس بولدى دەپ راسىمدەلگەنىن ايتادى.

"The Qazaq Times"