Qazaqstannıñ densaulıq saqtau vice-ministri Marat Şoranov. Foto: OrtKom (QR OKQ)

Qazaqstannıñ densaulıq saqtau ministrligi lokdaun jariyalau şartın qayta mälimdedi. Auruhanalarda nauqastarğa arnalğan tösekterdiñ 70%-dan astamı tolsa, karantin küşeymek.

Densaulıq saqtau vice-ministri Marat Şoranov 8 şildede OrtKom alañında ötken baspasöz jiınında äzirge eldegi tösek-orınnıñ 37%-ında sırqattar jatır dedi. Onıñ aytuınşa, pessimistik boljamğa säykes, tamız ayında nauqastar sanı eki ese artuı mümkin.

«Epidahualğa baylanıstı boljam özgerip-ekşelenip otıradı. Bizdiñşe, kelesi ayda pacientterdiñ qatarı köbeyedi. Eger pessimistik boljamğa jüginetin bolsaq, onda auru jwqqandar sanı eki ese artuı ıqtimal», – dedi Şoranov.

Vice-ministr jurnalisterdiñ karantindi qataytu josparı jönindegi swraqtaqtarına bergen jauabında vedomstvo öziniñ bwrınğı şartın basşılıqqa alatının habarladı. Bwl – auruhanadağı tösek-orındardıñ 70%-ına nauqastar tolğan jağdayda lokdaun şeşimi qabıldanadı. Onıñ sözinşe, epidahual naşarlap, is nasırğa şapqan künniñ özinde, birden qosımşa orındar jasaqtaladı.

Sonımen qatar, Şoranov qazir «densaulıq saqtau jüyesine tüsken jükteme küşeygenin» aytıp dabıl qaqtı. Mamandar eldegi törtinşi tolqınnıñ bastalu sebebin osı uaqıtqa deyingi ülgilerge qarağanda äldeqayda qauipti ündistandıq «del'ta» ştamınıñ tarauımen baylanıstıradı. DDSW 7 şildedegi dereginşe, qaterli del'ta ştamı düniejüziniñ 104 elinen anıqtalğan. Qazaqstanda auırğandar sanı resmi derek boyınşa jartı milionnan, al täuelsiz zertteuşilerdiñ esebinşe 5-6 milionnan asqan.

"The Qazaq Times"