Täjikstan Auğanstannan töngen qauip-qaterdiñ aldın alıp, oñtüstik şekaraların qorğau üşin Wjımdıq qauipsizdik şart wyımınan kömek swradı. 

Bwğan deyin Auğanstannıñ soltüstik audandarında ükimet äskeri täliptermen qaqtığısqa tüsip, 1,5 mıñday jauınger Täjikstan aumağına qaşıp ötken. Ahual uşıqqannan keyin resmi Duşanbe Wjımdıq qauipsizdik şart wyımınan şwğıl äreket etudi talap etip otır. Duşanbe Auğanstanmen şekaranı küşeytu üşin rezervtegi 20 mıñ azamattı äskerge şaqırdı. Sonımen qatar tälipter täjik-auğan şekarasınıñ boyında mıñ şaqırımğa juıq aumaqtı baqılap otır.

Osı mäselege baylanıstı mälimdeme jasağan Resey Sırtqı ister ministri Sergey Lavrov: «Auğanstandağı jağdaydı jiti baqılap otırmız. Eldegi ahual kürt naşarlap ketui mümkin degen qauip bar. Bwğan AQŞ pen NATO äskeriniñ auğan jerinen ketui äser etip otır. Ondağan jıldar boyı soğısqan şetel äskerleri Auğanstandağı jağdaydı twraqtandıru boyınşa aytarlıqtay nätijege qol jetkize almadı. Biz Täjikstan men Auğanstan şekarasındağı Resey bazasınıñ äleuetin paydalana otırıp, odaqtastarğa jasalatın kez kelgen agressiyalıq äreketterge toytarıs beru üşin qoldan kelgenniñ bärin jasauğa dayınbız», – dedi.

20 jıldan beri Auğanstanda terroristerge qarsı küresip kelgen AQŞ bastağan koaliciyalıq küşter mamır ayınan bastap äskerlerin şığarıp jatır. Qwrama Ştattar biligi 11 qırküyekke deyin äskerin Auğanstannan tolıq şığaratının jariyalağan.

1 şilde AQŞ memlekettik hatşısı Entoni Blinken Vaşingtonda Özbekstan men Täjikstan sırtqı ister ministrlerimen kezdesip, auğan taqırıbın talqıladı. Osılayşa, AQŞ Auğanstannan äskerin şığarıp jatqan twsta Uaşington Ortalıq Aziyadan strategiyalıq äriptes izdeuge köşti.

5 şilde Täjikstan öz şekarasın 1500-den astam auğan äskeri kesip ötkenin habarladı. Olar täliptermen qaqtığıs kezinde şeginip, täjik aumağına qaray ötuge mäjbür bolğan. Resmi derekke qarağanda, tälipter osı eldegi 400-ge juıq audanınıñ 160-tan astamın baqılauına alğan.

"The Qazaq Times"