Körneki suret.

Şildeniñ soñında Tokida ötetin XXXII jazğı Olimpiada oyındarında Qazaqstan tuın eki sportşı köterip şığadı. Olar: jeñil atlet Ol'ga Rıpakova jäne boksşı Qamşıbek Qoñqabaev.  Bwl turalı eldiñ Wlttıq Olimpiada komiteti habarladı.

"Men Ol'ga Rıpakovanıñ olimpiadanıñ aşılu saltanatında Qazaqstan tuın alıp şığatınına quanıştımın. Sebebi Ol'ganıñ arqasında kök bayrağımız olimpiada köginde bir emes, birneşe ret jelbiredi. Qamşıbek Qoñqabaev – qazaqstandıq sporttıñ küşi men şeberliginiñ ülgisi, Olimpiada şarşı alañında zor jauapkerşilikke ie bolğan boks qwramasınıñ kapitanı. Eki sportşı da qatarlastarınıñ aldı, qwramanıñ köşbasşıları jäne jas buınğa ülgi. Qos atletke jäne barlıq olimpiadalıq qwramğa sättilik tileymin" dedi Qazaqstan WOK basşısı Timur Qwlıbaev.

Ol'ga Rıpakova - Olimpiada oyındaranıñ aşılu saltanatında tu köterip şıqqalı twrğan alğaşqı äyel sportşı. Qazaqstan qwraması bwğan deyin qatısqan 7 Olimpiada oyınında da tudı er sportşılar wstap şıqqan. Bwdan bölek, Qazaqsan tarihında bir Olimpiada tu köteruşi retinde eki sportşı eşqaşan tañdalğan emes.

36 jastağı Ol'ga Rıpakova bwğan üş Olimpiadağa qatısqan. Üşeuinde jüldege ilindi. Ol 2008 jılı Beyjiñde kümis, 2012 jılı Londonda altın, 2016 jılı Rioda qola medal' jeñip aldı. 

Qamşıbek Qoñqabaev - bokstan Qazaqstan erler wlttıq qwramasınıñ kapitanı. Ol Aziya çempionatınıñ üş dürkin jäne älem çempionattarınıñ eki dürkin kümis jüldegeri. Olimpiadağı alğaş ret qatısqalı twr.

Bıltır koronavirus pandemiyasına baylanıstı bir jılğa şegerilgen Tokio Olimpiadasınıñ aşılu saltanatı 23 şildede ötedi.

"The Qazaq Times"