كورنەكى سۋرەت.

شىلدەنىڭ سوڭىندا توكيدا وتەتىن XXXII جازعى وليمپيادا ويىندارىندا قازاقستان تۋىن ەكى سپورتشى كوتەرىپ شىعادى. ولار: جەڭىل اتلەت ولگا رىپاكوۆا جانە بوكسشى قامشىبەك قوڭقاباەۆ.  بۇل تۋرالى ەلدىڭ ۇلتتىق وليمپيادا كوميتەتى حابارلادى.

"مەن ولگا رىپاكوۆانىڭ وليمپيادانىڭ اشىلۋ سالتاناتىندا قازاقستان تۋىن الىپ شىعاتىنىنا قۋانىشتىمىن. سەبەبى ولگانىڭ ارقاسىندا كوك بايراعىمىز وليمپيادا كوگىندە ءبىر ەمەس، بىرنەشە رەت جەلبىرەدى. قامشىبەك قوڭقاباەۆ – قازاقستاندىق سپورتتىڭ كۇشى مەن شەبەرلىگىنىڭ ۇلگىسى، وليمپيادا شارشى الاڭىندا زور جاۋاپكەرشىلىككە يە بولعان بوكس قۇراماسىنىڭ كاپيتانى. ەكى سپورتشى دا قاتارلاستارىنىڭ الدى، قۇرامانىڭ كوشباسشىلارى جانە جاس بۋىنعا ۇلگى. قوس اتلەتكە جانە بارلىق وليمپيادالىق قۇرامعا ساتتىلىك تىلەيمىن" دەدى قازاقستان ۇوك باسشىسى تيمۋر قۇلىباەۆ.

ولگا رىپاكوۆا - وليمپيادا ويىندارانىڭ اشىلۋ سالتاناتىندا تۋ كوتەرىپ شىققالى تۇرعان العاشقى ايەل سپورتشى. قازاقستان قۇراماسى بۇعان دەيىن قاتىسقان 7 وليمپيادا ويىنىندا دا تۋدى ەر سپورتشىلار ۇستاپ شىققان. بۇدان بولەك، قازاقسان تاريحىندا ءبىر وليمپيادا تۋ كوتەرۋشى رەتىندە ەكى سپورتشى ەشقاشان تاڭدالعان ەمەس.

36 جاستاعى ولگا رىپاكوۆا بۇعان ءۇش وليمپياداعا قاتىسقان. ۇشەۋىندە جۇلدەگە ءىلىندى. ول 2008 جىلى بەيجىڭدە كۇمىس، 2012 جىلى لوندوندا التىن، 2016 جىلى ريودا قولا مەدال جەڭىپ الدى. 

قامشىبەك قوڭقاباەۆ - بوكستان قازاقستان ەرلەر ۇلتتىق قۇراماسىنىڭ كاپيتانى. ول ازيا چەمپيوناتىنىڭ ءۇش دۇركىن جانە الەم چەمپيوناتتارىنىڭ ەكى دۇركىن كۇمىس جۇلدەگەرى. وليمپياداعى العاش رەت قاتىسقالى تۇر.

بىلتىر كوروناۆيرۋس پاندەمياسىنا بايلانىستى ءبىر جىلعا شەگەرىلگەن توكيو وليمپياداسىنىڭ اشىلۋ سالتاناتى 23 شىلدەدە وتەدى.

"The Qazaq Times"