Foto: www.nv-online.info

AQŞ Belarus'ke ekonomikalıq sankciya engizudi qarastırıp jatır. Aq üydiñ baspasöz hatşısı Djen Psakidiñ aytuınşa, prezident Bayden Belarus' mäselesin 16 mausımda Resey basşısı Vladimir Putinmen kezdesuinde köteredi.

Keşe Euroodaq Belarus'ke sankciya salu turalı şeşim şığarğan. Endi Belarus'qa qarastırılğan 3 milliard euro köleminde investiciyalıq jäne ekonomikalıq kömek körsetilmeydi. Bwğan deyin Europa wşaqtarın Belarus' äue keñistiginiñ üstimen wşırmau turalı şeşim qabıldağan. Sankciya küşine engennen bastap belorus aviaciyasına odaqtıñ 27 memleketiniñ äue keñistigin paydalanuğa tıyım salınadı.

23 mamırda Ryanair äue kompaniyasınıñ Grekiyadan Litvağa bara jatqan FR497 reysi kenetten bağıtın özgertip, Minskige qonuğa mäjbür bolğan. Belarus' biligi arnayı äskeri wşaq jiberip, reyste bomba boluı mümkin dep Ryanair wşağın Minskige bwrğan. Borttan bomba tabılmadı, esesine Belarus' policiyası wşaqta bolğan oppoziciyalıq jurnalist, NEXTA Live Telegram arnasınıñ negizin qalauşılardıñ biri, jurnalist Roman Protaseviçti twtqındadı. Wşaqtı bwruğa Belarus' rejiminiñ basında otırğan Aleksandr Lukaşenkonıñ özi bwyrıq bergen.

Bwl halıqaralıq därejede dau tuğızdı. Batıs elderi Belarus' biliginiñ äreketin ayıptap, jurnalisti bosatudı talap etti. Sonımen qatar Latviya wşaqtarın Belarus' üstimen wşırmaytının mälimdegen. Ukraina prezidenti Vladimir Zelenskiy de ükimetke Belarus'pen äue reysterin toqtatudı jäne bwl eldiñ töbesimen wşaq wşıruğa tıyım saludı tapsırdı.

Ayta keteyik, Roman Protaseviç – «Europanıñ soñğı diktatorı»Aleksandr Lukaşenkoğa qarsı jappay narazalıq şerulerinen habar taratqan NEXTA telegram-arnasınıñ negizin qalauşılardıñ biri. Belarus' biligi bwl arnanı ekstremistik media dep sanaydı. Soñğı kezderi ol «Belarus' golovnogo mozga» telegram-arnasın da jürgizgen. Keyinnen el biligi Protaseviçke halıqaralıq izdeu jariyalap, onı «terrorister tizimine» qosqan. Ol birneşe jıl bwrın qauipsizdik maqsatında Belarus'ten ketip qalğan.

"The Qazaq Times"