اقش بەلارۋسكە سانكتسيا سالۋدى قاراستىرىپ جاتىر

اقش بەلارۋسكە ەكونوميكالىق سانكتسيا ەنگىزۋدى قاراستىرىپ جاتىر. اق ءۇيدىڭ ءباسپاسوز حاتشىسى دجەن پساكيدىڭ ايتۋىنشا، پرەزيدەنت بايدەن بەلارۋس ماسەلەسىن 16 ماۋسىمدا رەسەي باسشىسى ۆلاديمير پۋتينمەن كەزدەسۋىندە كوتەرەدى.

كەشە ەۋرووداق بەلارۋسكە سانكتسيا سالۋ تۋرالى شەشىم شىعارعان. ەندى بەلارۋسقا قاراستىرىلعان 3 ميلليارد ەۋرو كولەمىندە ينۆەستيتسيالىق جانە ەكونوميكالىق كومەك كورسەتىلمەيدى. بۇعان دەيىن ەۋروپا ۇشاقتارىن بەلارۋس اۋە كەڭىستىگىنىڭ ۇستىمەن ۇشىرماۋ تۋرالى شەشىم قابىلداعان. سانكتسيا كۇشىنە ەنگەننەن باستاپ بەلورۋس اۆياتسياسىنا وداقتىڭ 27 مەملەكەتىنىڭ اۋە كەڭىستىگىن پايدالانۋعا تىيىم سالىنادى.

23 مامىردا Ryanair اۋە كومپانياسىنىڭ گرەكيادان ليتۆاعا بارا جاتقان FR497 رەيسى كەنەتتەن باعىتىن وزگەرتىپ، مينسكىگە قونۋعا ءماجبۇر بولعان. بەلارۋس بيلىگى ارنايى اسكەري ۇشاق جىبەرىپ، رەيستە بومبا بولۋى مۇمكىن دەپ Ryanair ۇشاعىن مينسكىگە بۇرعان. بورتتان بومبا تابىلمادى، ەسەسىنە بەلارۋس پوليتسياسى ۇشاقتا بولعان وپپوزيتسيالىق جۋرناليست، NEXTA Live Telegram ارناسىنىڭ نەگىزىن قالاۋشىلاردىڭ ءبىرى، جۋرناليست رومان پروتاسەۆيچتى تۇتقىندادى. ۇشاقتى بۇرۋعا بەلارۋس رەجيمىنىڭ باسىندا وتىرعان الەكساندر لۋكاشەنكونىڭ ءوزى بۇيرىق بەرگەن.

بۇل حالىقارالىق دارەجەدە داۋ تۋعىزدى. باتىس ەلدەرى بەلارۋس بيلىگىنىڭ ارەكەتىن ايىپتاپ، ءجۋرناليستى بوساتۋدى تالاپ ەتتى. سونىمەن قاتار لاتۆيا ۇشاقتارىن بەلارۋس ۇستىمەن ۇشىرمايتىنىن مالىمدەگەن. ۋكراينا پرەزيدەنتى ۆلاديمير زەلەنسكي دە ۇكىمەتكە بەلارۋسپەن اۋە رەيستەرىن توقتاتۋدى جانە بۇل ەلدىڭ توبەسىمەن ۇشاق ۇشىرۋعا تىيىم سالۋدى تاپسىردى.

ايتا كەتەيىك، رومان پروتاسەۆيچ – «ەۋروپانىڭ سوڭعى ديكتاتورى»الەكساندر لۋكاشەنكوعا قارسى جاپپاي نارازالىق شەرۋلەرىنەن حابار تاراتقان NEXTA تەلەگرام-ارناسىنىڭ نەگىزىن قالاۋشىلاردىڭ ءبىرى. بەلارۋس بيلىگى بۇل ارنانى ەكسترەميستىك مەديا دەپ سانايدى. سوڭعى كەزدەرى ول «بەلارۋس گولوۆنوگو موزگا» تەلەگرام-ارناسىن دا جۇرگىزگەن. كەيىننەن ەل بيلىگى پروتاسەۆيچكە حالىقارالىق ىزدەۋ جاريالاپ، ونى «تەرروريستەر تىزىمىنە» قوسقان. ول بىرنەشە جىل بۇرىن قاۋىپسىزدىك ماقساتىندا بەلارۋستەن كەتىپ قالعان.

"The Qazaq Times"