Atakent mañındağı epidemiya jöninde eskertuge arnalğan körneki aqparat. 20 säuir 2021 jıl. Foto: QT / Kültegin Aspanwlı

Qazir elde auırıp jatqan adamdardıñ şirekten asa böligi Almatı qalasınan. 40 mıñ nauqastıñ 10 mıñdayı almatılıq.  Qırıq tört künnen beri «qızıl aymaqta» twrğan qalada säuir ayındağı auruşañdıq twtas naurız ayındağı jiıntıq esepten asıp tüsti (naurız ayı – 9631, 1-22 säuir – 14 525 nauqas). Qalada beysenbi küni 700-dey sırqat anıqtaldı. Onıñ 613-inde simptomdıq belgileri bar, 85-i simptomsız.

Qoğamdıq densaulıq saqtau basqarmasınıñ mälimetinşe, ötken täulikte 394 adam auruhanağa jatqızılğan jäne 360 adam üyine jiberilgen. Naurız ayınıñ ortasında bas sanitar däriger Jandarbek Bekşin bir künde auruhanağa jatqızılğandar sanı 500-den assa, qalada lokdaun küşeytilip, blok-beket qoyılatının eskertken.

Jalpı qalada 5954 adam ambulatorlıq deñgeyde emdelude jäne sıyımdılığı 6060 orın bolatın infekciyalıq stacionarlarda 3792 adam jatır. Olardıñ arasında jağdayı jeñil äri orta deñgeyde 105 bala bar. Bwdan özge auruhandağı eresekterdiñ 900-deyi auır jäne 3118-i orta hälde. Al reanimaciya jäne qarqındı terapiya bölimderinde 215 nauqas bar. 26 adam ÖJJ, 93 nauqas invazivti emes ÖJJ-ımen jäne 87 sırqat High flow apparatımen tınıstap jatır.

Resmi derekke qarağanda, jalpıhalıqtıq vakcinaciyalau nauqanı bastalğalı, yağni 1 aqpannan beri megapoliste 162 mıñ adam ekpe alğan. Äkimdik mälimetinşe, äzirge 205 egu punkti men 406 egu brigadasında 1827 medqızmetker jwmıs isteydi.

Bıltır birinşi tolqında – «mausım-şilde qırğınında» 6372, qazan ayında jürgen ekinşi tolqında 3607 jäne biıl köktemgi üşinşi tolqında äzirge 24 156 jağday tirkeldi.

BAÄ, Mısır, Mal'div, Şri-Lanka, QHR, Oñtüstik Koreya, Germaniya, Ukraina, Resey tärizdi elderden Almatı qalasına 1 naurız ben 13 säuir aralığında jüzdegen halıqaralıq äue reysi keldi. Bir jarım ayda Alatau baurayına 687 reyspen 100 mıñday jolauşı wşıp kelgen: 95 mıñ adam PTR qorıtındısımen, 4590 adam test anıqtamasınsız. Osınıñ saldarınan jwğu jäne ölimge soqtıru qateri joğarı britandıq jäne oñtüstikafrikalıq ştamdar tirkelip, özge öñirlerge taralğan.

Elde qañtar ayınıñ ekinşi jäne aqpan ayınıñ alğaşqı jartısında nauqastar sanı kürt köbeygen. Aqpan ayınıñ ekinşi jartısında birşama kemigen edi, dese de naurızda qayta arttı. Qazir täuligine 2,5 mıñ sırqat jäne 20 şaqtı ölim jağdayı tirkelip jatır. Qalanıñ bas sanitar därigeri Jandarbek Bekşin bes aptada 10 qaulı şığardı. Sebebi qabıldanğan ereje men qatañdatılğan lokdaun şarası kütkendey nätije bermedi. Mwnı 5 säuir küngi brifingte Bekşin demalıs künderi qoğamdıq kölikti toqtatu jäne sauda qatarlarınıñ jwmısın şekteu siyaqtı şeşim «tiimsiz bolğanın», yağni bwdan indet ahualı jaqsarmağanın moyındadı. Nauqastar virustı «köbine jayau jürginşilerdiñ joldarı men sayabaqta» jwqtırğanın aytqan. Degenmen karantin şarası jeñildegendikten äri jaña ştamnıñ äserinen on ayda tirkelgen keystiñ jeteqabıl mölşeri keyingi elu künde tirkelip ülgerdi. Almatıda pandemiya kezinde koronavirus pen pnevmoniya sırqattarınıñ qatarı 54 mıñğa jetti. Mwnıñ 44%-ı, yağni 24 mıñ adam osı köktemde tirkelgen. Ökinişke qaray, keyingi bir jarım ayda 294 almatılıq köz jwmğan.

Bıltır 13 naurızdan beri COVID-19 infekciyasın jwqtırğandar qatarı 301 mıñğa juıqtap, 1 tamızdan bılayğı koronavirus pnevmoniyası 52 mıñnan asqan. DDSW derekqorı men Wlttıq statistikada Qazaqstanda auırğandar sanı 353 mıñğa jetken. Biraq Ükimet koronavirus pen onıñ pnevmoniyasın eki bölek esepteydi. Sonday-aq pandemiya kezinde jalpı virus jwqqandardıñ 5895-i (KVI+ / U07.1 – 3512, KVI- / U07.2 – 764, ilespe aurulardan – 1619) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi.

"The Qazaq Times"