Keşe AQŞ-tıñ Auğanstandağı «Islam memleketi» lañkestik wyımınıñ  sodırların bombılağannan keyin. Resey Özbekstanğa äskeri tehnika beretinin mälimdedi. Bwl degenimiz resmi Mäskeu Auğanstandağı AQŞ äreketine alañdaulı degen söz be?. Ortalıq Aziyada  Qazaqstannıñ röli qanday?. Osı jäne özgede swraqtarğa bügin jauap izdep kördik.

Süriyadağı Resey men AQŞ teketiresi endi Auğanstan aumağında da öz jalğasın tabatın siyaqtı. Resmi Kreml', AQŞ-tıñ Auğanstandağı äreketine qarsı eşqanday mälimdeme jasamağanımen, Özbekstanğa äskeri tehnika jetkizemiz dep aytuı arqılı öz közqarasın bildirgendey sıñay tanıttı. Tayau şığıstan bölek Ortalıq Aziya üşin küres, Aqüy men Kreml' arasında bayağıdan jürip kele jatqanı belgili. Al bwl jağdayda Qazaqstan «barikadanıñ» qay jağında bolatını äzirge belgisiz bolıp twr. Batıstıq basılımdar Aqorda basşısı Nwrswltan Nazarbaevtıñ latın älipbiine köşu jönindegi  Qazaqstan halqına ündeuin, resmi Astananıñ Batısqa bet alısı dep bağalap jatır. Al Reseylik BAQ ökilderi latın älipbiin jerden alıp, jerge salıp sınauda.

Jaqında Resey prezidenti Vladimir Putin «Mir» tele arnasına bergen swhbatında «TMD elderinde sırtqı küşterge  «türli tüsti» revolyuciya jasauğa jol bermeymiz» - degen bolatın. Al Qazaqstan biligi batıs basılımdarı jazğanday Reseyden alşaqtap, batısqa qaray bet alatın bolsa, «türli tüsti»  revolyuciyağa jol bermeytin jwrttıñ özi, Ukrainadağıday  el tınıştığın bwzuı ğajap emes.  Bwnday jağdayda Qazqastannıñ mwnay öndiru salasına  qıruar qarjı salğan Qıtay ne deydi eken?...  Ol jağı ärine beymälim. Bayqap qarasaq täuelsizdik alğan jıldarımen salıstırğanda Qazaqstandağı paydalı qazba baylıqtardı öndirude AQŞ, Italiya, Wlıbritaniya sındı memleketerdiñ üles salmağı azayıp, Qıtaylıq kompaniyalardıñ sanı artqan. Biraq bwl degenimiz resmi Beyjiñ bizdi qiın-qıstau zamanda qoldaydı degen söz emes ärine. Bwl  Qıtay bizdi qarjılay, ekonomikalıq twrğıdan özine täueldi qıluı mümkin degen qauiptiñ bar ekendigi.  Biliktiñ jerdi jalğa beru, 26-bapqa özgertuler engizu kerek degenine halıqtıñ narazılıq tanıtqanı sodan. Öytkeni qazaq halqı Qıtaydıñ soğıssız jaulap alatının tarihtan jaqsı biledi.

Qorıta kelgende qazir Qazaqstan «arbanı da sındırmay, ögizdi de öltirmey» ötetin ötpeli kezeñde twr. El biligi 25 jıl boyı wstanıp kelgen «köp vektorlı» sayasattıñ nağız sınğa tüsetin säti kelgen siyaqtı.

“The Qazaq Times”