كەشە اقش-تىڭ اۋعانستانداعى «يسلام مەملەكەتى» لاڭكەستىك ۇيىمىنىڭ  سودىرلارىن بومبىلاعاننان كەيىن. رەسەي وزبەكستانعا اسكەري تەحنيكا بەرەتىنىن مالىمدەدى. بۇل دەگەنىمىز رەسمي ماسكەۋ اۋعانستانداعى اقش ارەكەتىنە الاڭداۋلى دەگەن ءسوز بە؟. ورتالىق ازيادا  قازاقستاننىڭ ءرولى قانداي؟. وسى جانە وزگەدە سۇراقتارعا بۇگىن جاۋاپ ىزدەپ كوردىك.

سۇرياداعى رەسەي مەن اقش تەكەتىرەسى ەندى اۋعانستان اۋماعىندا دا ءوز جالعاسىن تاباتىن سياقتى. رەسمي كرەمل، اقش-تىڭ اۋعانستانداعى ارەكەتىنە قارسى ەشقانداي مالىمدەمە جاساماعانىمەن، وزبەكستانعا اسكەري تەحنيكا جەتكىزەمىز دەپ ايتۋى ارقىلى ءوز كوزقاراسىن بىلدىرگەندەي سىڭاي تانىتتى. تاياۋ شىعىستان بولەك ورتالىق ازيا ءۇشىن كۇرەس، اقۇي مەن كرەمل اراسىندا باياعىدان ءجۇرىپ كەلە جاتقانى بەلگىلى. ال بۇل جاعدايدا قازاقستان «باريكادانىڭ» قاي جاعىندا بولاتىنى ازىرگە بەلگىسىز بولىپ تۇر. باتىستىق باسىلىمدار اقوردا باسشىسى نۇرسۇلتان نازارباەۆتىڭ لاتىن الىپبيىنە كوشۋ جونىندەگى  قازاقستان حالقىنا ۇندەۋىن، رەسمي استانانىڭ باتىسقا بەت الىسى دەپ باعالاپ جاتىر. ال رەسەيلىك باق وكىلدەرى لاتىن ءالىپبيىن جەردەن الىپ، جەرگە سالىپ سىناۋدا.

جاقىندا رەسەي پرەزيدەنتى ۆلاديمير پۋتين «مير» تەلە ارناسىنا بەرگەن سۇحباتىندا «تمد ەلدەرىندە سىرتقى كۇشتەرگە  «ءتۇرلى ءتۇستى» رەۆوليۋتسيا جاساۋعا جول بەرمەيمىز» - دەگەن بولاتىن. ال قازاقستان بيلىگى باتىس باسىلىمدارى جازعانداي رەسەيدەن الشاقتاپ، باتىسقا قاراي بەت الاتىن بولسا، «ءتۇرلى ءتۇستى»  رەۆوليۋتسياعا جول بەرمەيتىن جۇرتتىڭ ءوزى، ۋكرايناداعىداي  ەل تىنىشتىعىن بۇزۋى عاجاپ ەمەس.  بۇنداي جاعدايدا قازقاستاننىڭ مۇناي ءوندىرۋ سالاسىنا  قىرۋار قارجى سالعان قىتاي نە دەيدى ەكەن؟...  ول جاعى ارينە بەيمالىم. بايقاپ قاراساق تاۋەلسىزدىك العان جىلدارىمەن سالىستىرعاندا قازاقستانداعى پايدالى قازبا بايلىقتاردى وندىرۋدە اقش، يتاليا، ۇلىبريتانيا سىندى مەملەكەتەردىڭ ۇلەس سالماعى ازايىپ، قىتايلىق كومپانيالاردىڭ سانى ارتقان. بىراق بۇل دەگەنىمىز رەسمي بەيجىڭ ءبىزدى قيىن-قىستاۋ زاماندا قولدايدى دەگەن ءسوز ەمەس ارينە. بۇل  قىتاي ءبىزدى قارجىلاي، ەكونوميكالىق تۇرعىدان وزىنە تاۋەلدى قىلۋى مۇمكىن دەگەن قاۋىپتىڭ بار ەكەندىگى.  بيلىكتىڭ جەردى جالعا بەرۋ، 26-باپقا وزگەرتۋلەر ەنگىزۋ كەرەك دەگەنىنە حالىقتىڭ نارازىلىق تانىتقانى سودان. ويتكەنى قازاق حالقى قىتايدىڭ سوعىسسىز جاۋلاپ الاتىنىن تاريحتان جاقسى بىلەدى.

قورىتا كەلگەندە قازىر قازاقستان «اربانى دا سىندىرماي، وگىزدى دە ولتىرمەي» وتەتىن وتپەلى كەزەڭدە تۇر. ەل بيلىگى 25 جىل بويى ۇستانىپ كەلگەن «كوپ ۆەكتورلى» ساياساتتىڭ ناعىز سىنعا تۇسەتىن ءساتى كەلگەن سياقتى.

“The Qazaq Times”