Mizieev Älievti jeñisimen tağı bir märte qwttıqtadı. Foto: Ekspress K.

Özbekstan prezidenti Orta Aziya elderi arasınan birinşi bolıp Taulı Qarabaq mäselesi turalı aşıq pikir bildirdi. Şavkat Mirzieev Qarabaq soğısınıñ nätijesin Äzirbayjannıñ bir retki tarihi jeñisi qatarında bağalağan.

Äzirbayjen men Armeniya arasındağı Taulı Qarabaq qaqtığısı Reseydiñ ıqpalı basım TMD elderi, äsirese Äzirbayjanmen bauırlas Ortalıq Aziya elderi üşin sezimtal taqırıp bolatın. Sonıñ işinde, Äzirbayjanmen tarihi tamırlas, tuıstas bolğanımen Resey jäne Armeniyamen ekonomikalıq odaq işindegi Qazaqstan men Qırğızstan üşin Qarabaq soğısına bağa beru qiınğa soqqan. Qazaq pen qırğız biligi Baku men Erevanğa birjaqtı qoldau körsetuden barınşa aynalıp ötuge tırısqan.

Birer kün bwrın ötken Türki tildi memleketterdiñ ıntımaqtastıq keñesinñ sammitinde özbek basşısı Qarabaq soğısın «Äzirbayjannıñ tarihi ädilettilikti qaytaru jolındağı jeñisi» dep bağaladı jäne öñirdegi mädeni-tarihi mwralardı qalpına keltirude bauırlas Äzirbayjan jwrtına qoldau körsetuge dayın ekenin bildirdi. Tipti, sammit barısında Iliham Älievti tağı bir märte jeñisimen qwttıqtadı.

Özbekstannıñ Taulı Qarabaq isi boyınşa Äzirbayjandı aşıq qoldauı köptegen eldiñ sayasatkerleri men sarapşılarınıñ nazarın audararı sözsiz. Bwl sonday-aq Özbekstan sırtqı sayasatındağı Reseyge täuelsiz wstanımın da ayqındaydı. Täşkent bwnday mälimdemeni jasay otırıp Mäskeudiñ de özine degen jaña wstanımına ie boluı mümkin.

Qazaqstanmen salıstırğanda Özbekstannıñ Qarabaq soğısına aşıq pikir aytuına mümkindik köp. Eñ äueli Täşkent pen Erevan ortasında diplomatiyalıq qarım-qatınas onşa emes. Taraptar bir-birine elşi de almaspağan. Özbekstannıñ eki prezidenti de eşqaşan Armeniyağa memlekettik saparmen barğan emes. Qalay degen künde de Orta Aziyadağı türki tildes elder arasında bauırlas Äzirbayjandı qoldap şıqqan alğaşqı el retinde Özbekstannıñ türki tildi respublikalar arasındağı abroy bedeli artpaq.

“The Qazaq Times”