اقش مەملەكەتتىك دەپارتامەنتىنىڭ جەتەكشىسى ەنتوني بلينكەن رەسەيدىڭ امەريكا قۇراما شتاتتارىنا قارسى قاستاندىق ارەكەتتەرى تەكسەرىلىپ جاتقانىن، بۇل كۇدىك راستالسا «اۋىر جاۋابى» بار ەكەنىن ايتتى. مەملەكەتتىك حاتشى بۇل پىكىرىن CNN ارناسىنا بەرگەن سۇحباتىندا ورتاعا سالعان.

بلينكەن ءسوزى رەسەيدىڭ قۇراما شتاتقا قارسى زياندى ءىس-قيمىلدارى تۋرالى بارلاۋ قىزمەتىنىڭ تەرگەۋ جۇمىستارىن مەڭزەيدى. قازىر اقش ورتالىق بارلاۋ اگەنتتىگى وسى تۋراسىندا قورىتىندى مالىمدەمە دايىنداپ وتىر. جاقىندا اقش كونگرەسس مۇشەلەرى الدىندا بايانداما جاسالماق. بلينكەن سوزىندە ەگەر اتالعان قورىتىندى دا رەسەيدىڭ «قاستاندىعى» راستالسا «اقش مۇددەسىن قورعاۋ ءۇشىن ءتيىستى شارالار جاسالاتىنىن» ايتقان.

اقش مەم. حاتشىسىنىڭ سوزىنشە، قۇراما شتاتتاردىڭ باتىستىق وداقتاستارىنا رەسەيگە قاتىستى «سەرگەك بولۋ» ەسكەرتىلگەن ەكەن، سوعان قوسا ماسكەۋدى بىرلەسىپ جاۋاپقا تارتۋ ءۇشىن «ورتاق مىندەتتەمە» العان.

ول رەسەيگە ناقتى قانداي جاۋاپ قايتارىلاتىنىن اشىق ايتپاعان. تەك، قارسى شارالار ناتو-داعى وداقتاستارىمەن اقىلداسۋ ۇستىندە ەكەنىن بىلدىرگەن. اقش باس ديپلوماتىنىڭ بۇل سوزىنە قاراعاندا رەسەيگە قارسى كەزەكتى جاۋاپ اسا اۋقىمدى بولۋى مۇمكىن. بۇعان ءتىپتى ناتو-داعى وداقتاستارى دا تارتىلۋى مۇمكىن.

بايدەن اكىمشىلىگىنىڭ پۋتين بيلىگىنە قاتاڭ بولاتىنى وسىعان دەيىن دە، ءتىپتى ول قىزمەتكە كىرىسۋدەن بۇرىن ايتىلىپ كەلگەن ەدى. پۋتين مەن بايدەن يادرولىق قارۋدى باقىلاۋعا الۋ كەلىسىمىنىڭ مەرزىمىن ۇزارتۋ تۋراسىندا تەز ءتىل تابىستى. بۇل كەيبىر ساراپشىلاردى ۋاشينگتون مەن ماسكەۋ اراسىندا جىلىمىق بولۋى دا مۇمكىن دەپ بولجاۋعا يتەرمەلەگەن. بىراق، ءبىر عانا ماسەلەدە كەلىسىمگە كەلىپ، بايدەن ءپۋتيننىڭ ول قادامىن القاعانىمەن باسقا ماسەلەلەر جەتەرلىك بولدى. اسىرەسە، اۋعانستانداعى اقش اسكەرلەرىن ولتىرگەن تالىپتەرگە سىياقى تولەۋ تۋرالى ايىپتاۋ كرەملگە وڭاي تيگەن جوق. وسى سەكىلدى ايىپتارى دالەلدەنسە الداعى ۋاقىتتا رەسەيگە ەس جيا المايتىن جاڭا سانكتسيا سالىنۋى مۇمكىن دەپ بولجاۋعا نەگىز بار.

جالپى رەسەيگە تاعىلعان نەگىزگى ايىپتاردىڭ قاتارى مىناۋ: اقش-تاعى سايلاۋعا ارالاسۋ ارقىلى، دەموكراتيالىق جۇيەگە قول سۇعۋ; اقش-تىڭ Solar Wind تەحنولوگيالىق كومپانياسىنىڭ اقش ۇكىمەتتىك جەلىسىنە ەنۋ ءۇشىن حاكەرلىك شابۋىل جوسپارلاعان; اۋعان جەرىندەگى اقش اسكەرلەرىن ولتىرگەندەرگە سىياقى تولەگەن، ت.ب. ەگەر بۇعان «گاۆانا سيندرومى» دا رەسەيدىڭ ايىبى قاتارىنا جاتقىزىلسا ونىڭ سالدارى رەسەي ءۇشىن ءتىپتى دە اۋىر بولا تۇسەدى.

ارينە، ءوز كەزەگىندە ماسكەۋ بۇل ايىپتاردى جوققا شىعاردى.

“The Qazaq Times”